قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلى قازاقستاندىقتاردى قۇربان ايت مەيرامىمەن قۇتتىقتادى، دەپ حابارلايدى “ادىرنا” ۇلتتىق پورتالى.
اسا قامقور، ەرەكشە مەيىرىمدى اللانىڭ اتىمەن باستايمىن!
قادىرلى جاماعات!
بارشاڭىزدى ۇلىق مەيرام – قۇربان ايتتىڭ كەلۋىمەن شىن جۇرەكتەن قۇتتىقتايمىن! ايت قابىل بولسىن!
سىزدەرگە اماندىق پەن ساۋلىق، بىرلىك پەن بەرەكە تىلەيمىن.
قۇربان ايت – شىنايى نيەت پەن اللاعا دەگەن سۇيىسپەنشىلىكتى پاش ەتەتىن مەيرام. ۇلىق مەرەكەنىڭ تاربيەلىك ءمانى مەن ماعىناسى وسىندا جاتىر.
قاسيەتتى قۇراندا: «ۇمىتپاڭدار، ولاردىڭ ەتى دە، قانى دا ەشقاشان اللاعا جەتپەيدى. وعان جەتەتىن نارسە – جۇرەكتەرىڭىزگە ۇيالاعان تاقۋالىقتارىڭ (شىنايى نيەتتەرىڭ)» («حاج» سۇرەسى، 37-ايات), – دەلىنگەن.
اياتتا ايتىلعانداي، قۇداي جولىندا جاقسىلىق جاساۋعا نيەتتەنگەن پەندە بۇل امالدى رياسىز ويمەن ورىندايدى. ادام بالاسى قۇرباندىق شالۋ ارقىلى اللانىڭ بەرگەن ريزىق-نەسىبەسىنە شۇكىر ەتەدى. قۇدايدىڭ ءناسىپ ەتكەن نىعمەتتىڭ ءبىر بولىگىن كومەككە مۇقتاج جاندارعا ۇلەستىرىپ، ولاردىڭ دا اقىسىن بەرىپ، قۋانىشقا بولەيدى. ويتكەنى، پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «پارىز امالدان كەيىنگى اللاعا ۇنامدى ءىس – مۇسىلماننىڭ جۇرەگىنە قۋانىش سىيلاۋ» دەگەن.
حالقىمىز «بوتا العانشا باتا ال» دەيدى. ۇلكەننىڭ، جالپى كومەككە مۇقتاج جانداردىڭ العىسىن الىپ، باتاسىنا بولەنۋ – ايت كەزىندە ورىندالاتىن ساۋاپتى ءىستىڭ ءبىرى.
مۇسىلمان بالاسىنىڭ ۇلىق كۇندە شىنايى نيەتپەن قۇربان شالىپ، قۇرباندىق ەتىن مۇگەدەكتەر مەن جەتىمدەرگە، كوپبالالى وتباسىلار مەن قارتتارعا تاراتىپ، ولاردىڭ العىسىن الۋعا تىرىساتىنى سوندىقتان. وسى رەتتە ەلىمىزدەگى بارشا كاسىپكەر ازاماتتاردى قۇربان ايتتىڭ قۇرمەتىنە مال قۇنىن قولدان كوتەرمەي، حالىقتىڭ الەۋمەتتىك جاعدايىن ەسكەرىپ، وڭتايلى باعا ۇسىنۋعا، جۇرت كۇندە تۇتىناتىن ازىق-تۇلىككە مۇمكىندىگىنشە جەڭىلدىك جاساۋعا شاقىرامىن.
قۇربان ايتتىڭ نەگىزگى ءمانى مۇسىلماندار اراسىندا ءوزارا مەيىرىمدىلىك، جومارتتىق، قايىرىمدىلىق، قاناعات سىندى ادامگەرشىلىك قۇندىلىقتاردى قالىپتاستىرۋ ەكەنىن ەستەن شىعارماعان ابزال. اللانىڭ راقىم نۇرى توگىلەتىن ايتتا جۇرتىمىزعا جاقسىلىق جاساپ، كوپشىلىكتىڭ ريزاشىلىعىنا بولەنەيىك. قۇرمەتتى وتانداستار! بۇگىندە الەم مۇسىلماندارى ەكى جىلعا سوزىلعان ۇزىلىستەن كەيىن ۇلكەن قاجىلىق جاساۋدا. سولاردىڭ قاتارىندا مەككە قالاسىندا قاجىلىق پارىزىن وتەپ جۇرگەن 4 مىڭ وتانداسىمىزدىڭ نيەتى مەن دۇعاسى قابىل بولىپ، ەلىمىزگە امان-ەسەن ورالۋىن تىلەيمىز.
اللا تاعالا ەلىمىز بەن جەرىمىزگە بەرەكەسىن جاۋدىرىپ، شالعان قۇرباندىقتارىمىزدى، بەرگەن ساداقالارىمىزدى، ايت كۇندەرى امالعا اسىرعان اللاعا ۇنامدى ءاربىر يگى ىستەرىمىزدى قابىل ەتكەي.
ايتتان ايتقا امان-ەسەن جەتە بەرەيىك. ءامين!
“ادىرنا” ۇلتتىق پورتالى
