قاڭتار قىرعىنىنان كەيىن نازارباەۆ ءوز مۇلكىن ۇلى تاۋمان نۇرسۇلتاننىڭ اتىنا اۋدارعان - باق

جاسىل ارال ەسىل اۋدانى مەن الماتى اۋدانى شەكتەسكەن تۇستا ورنالاسقان. اقوردا مەن ەلباسى كەڭسەسىنە جاقىن. ارال مەن بۇل ەكى عيماراتتى تىكەلەي جالعايتىن جول دا بار. بۇل جول ەسىل وزەنىنىڭ بويىنداعى پرەزيدەنت ساياباعىنىڭ ىشىنە توسەلگەن.

2004 جىلى قازاقستان پرەزيدەنتىنىڭ باس رەزيدەنتسياسى – اقوردانىڭ قۇرىلىسى اياقتالدى. سول ۋاقىتتا تەلمان ىقشاماۋدانىندا ەسىلدىڭ ارناسى ەكىگە ءبولىنىپ، جاساندى ارال پايدا بولدى. وعان جاسىل ارال دەگەن رەسمي اتاۋ بەرىلگەن.

ارالدىڭ اۋماعى كاداستر بازاسىنا بەس ۋچاسكەگە ءبولىنىپ ەنگىزىلگەن. جيىنى 118 341 شارشى مەتر، ياعني، 12 گەكتارعا جۋىق جەر. وندا بىرنەشە ءۇي ورنالاسقان. جەرى مەن سارايدىڭ اۋقىمى جونىنەن ەڭ ۇلكەن بولىگى ەكس-پرەزيدەنت نۇرسۇلتان نازارباەۆقا 2007 جىلى سىيعا بەرىلگەن. بۇل ۋچاستوك جەر كاداسترى جۇيەسىندە 21-320-087-397 نومىرىمەن تىركەلگەن. جىلجىمايتىن مۇلىكتى ەكس-پرەزيدەنت بيىل قاڭتار وقيعاسىنان كەيىن تاۋمان نۇرسۇلتاننىڭ اتىنا سىيعا تارتۋ شارتىمەن اۋدارىپ بەرگەن. 2000 جىلداردىڭ اياعىندا تاۋەلسىز باسىلىمدار نۇرسۇلتان نازارباەۆ پەن ونىڭ ء"ۇشىنشى ايەلى" اسەل قۇرمانباەۆانىڭ "تاۋمان جانە بايكەن دەگەن ەكى ۇلى بار" دەپ جازعان. ەكس-پرەزيدەنت سودان بەرى بۇل اقپاراتتى راستاعان دا، تەرىسكە شىعارعان دا جوق.

جاسىل ارالدا تەننيس كورتى، تىكۇشاق قوناتىن الاڭقاي جانە قوسالقى نىساندار بار. ارالدىڭ وزگە ۋچاسكەلەرى بۇرىنعى پرەزيدەنتتىڭ ءىنىسى بولات نازارباەۆتىڭ وتباسىنا قارايدى. ول دا قاڭتار وقيعاسىنان كەيىن اتىندا تۇرعان ۇلكەن جەر تەلىمىن ۇل-قىزى نۇربول، قۇندىز نازارباەۆتارعا وتكىزىپ بەرگەن. مۇلىكتەردىڭ جەكە مەنشىك قۇقىعى جاننات نازارباەۆا دەگەن ادامنىڭ اتىنا دا جازىلعان.

نۇرسۇلتان نازارباەۆتىڭ بۇل ۇيدە تۇراتىنى ءھام تۇرمايتىنى بەلگىسىز. دەگەنمەن اۋماققا كۇزەت قويىلعان. وسى جۋرناليستىك زەرتتەۋ بارىسىندا جاسىل ارالعا وتپەك بولدىق. ىشكى ىستەر مينيسترلىگىنىڭ كۇزەت ءپاترۋلى توقتاتىپ، وپەراتور ەكەۋىمىزدىڭ قۇجاتىمىزدى تەكسەردى. اۋەلى مەملەكەتتىك كۇزەت قىزمەتىنىڭ وكىلدەرى كەلەتىنىن ەسكەرتتى دە، كەيىن جۇمىسىمىزدى جالعاستىرۋعا رۇقسات بەردى. زاڭ بويىنشا، ەكس-پرەزيدەنت نازارباەۆ تۇراتىن ءۇيدى مەملەكەتتىك كۇزەت قىزمەتى قاراۋىلدايدى.

پرەزيدەنتتىڭ ءىس باسقارماسى وسى ارالدىڭ قۇرىلىس سالىنباعان، قورشالماعان بولىگىنەن ءۇش گەكتاردان استام جەردى ءبولىپ العان. بۇل – نۇر-سۇلتان قالاسى جەر قاتىناستارى باسقارماسى گەوپورتالىنىڭ دەرەگى. بولىنگەن جەردى رەزيدەنتسيا دەپ اتاپ، ءىس باسقارماسىن قۇرىلىس سالۋشى دەپ كورسەتكەن. باسقارما ءبىز جولداعان رەسمي ساۋالعا ء"سىز جازعان جاساندى ارالداعى جىلجىمايتىن مۇلىككە ءىس باسقارماسىنىڭ قاتىسى جوق، ول جاقتاعى تۇرعىن ءۇي قۇرىلىسىنا قارجى بولگەن ەمەس" دەپ جاۋاپ قايىردى.

جاسىل ارال جاسالىپ جاتقاندا ونىمەن ىرگەلەس، وزەننىڭ ەكىنشى جاعاسىنداعى ۋچاسكەگە ءزاۋلىم ساراي سالىنىپ، اينالاسى بەزەندىرىلگەن. جەتى جىل بۇرىنعى رەسمي قۇجاتتاردا بۇل اۋماق قازاقستان پرەزيدەنتىنىڭ "نۇرا" رەزيدەنتسياسى دەپ اتالعان. قازىر بۇل جىلجىمايتىن مۇلىك نازارباەۆتىڭ مەنشىگىندە.

21-320-135-1753 كاداستر نومىرىمەن تىركەلگەن ءزاۋلىم ساراي ەكس-پرەزيدەنتكە "جىلجىمايتىن مۇلىكتى باسقارۋ جونىندەگى ديرەكتسيا" كومپانياسى ارقىلى قارايدى. ال بۇل كومپانياعا "ەلباسى" قورى يەلىك ەتەدى. قوردىڭ قۇرىلتايشىسى – نۇرسۇلتان نازارباەۆ.

كولەمى بۇدان ءسال كىشىرەك قاسىنداعى ەكىنشى ءۇي دە "ەلباسى" قورىنا قارايدى. ونىڭ ىرگەسىندەگى ءۇش گەكتار ۋچاسكە مەن سۇر شاتىرلى ءۇي بايكەن نۇرسۇلتاننىڭ اتىندا تۇر. مۇلىك 2017 جىلى سىيعا تارتۋ شارتىمەن بەرىلگەن. ايتىلعان ءۇش ءۇيدىڭ اۋماعى بىرگە قورشالعان. بارىنە ورتاق تىكۇشاق الاڭى بار.

"ادىرنا" ۇلتتىق پورتالى