دجاكارتا قالاسىندا ديماش قۇدايبەرگەننىڭ جانكۇيەرلەرى جينالىپ، فان-كلۋبتىڭ 5 جىلدىعىن اتاپ ءوتتى. ونىڭ قاتارىندا 10 مىڭداي ادام بار، دەپ حابارلايدى «ادىرنا» ءتىلشىسى «حابار 24»-كە سىلتەمە جاساپ.
بۇل كەزدەسۋدى يندونەزيانىڭ ۇلتتىق كىتاپحاناسى مەن قازاقستان ەلشىلىگى ۇيىمداستىردى. ديماش جانكۇيەرلەرى ونىڭ اندەرىن ورىنداپ، قازاقستان مادەنيەتىمەن جاقىنىراق تانىسۋعا مۇمكىندىك الدى. يندونەزيا استاناسىندا ديماش قۇدايبەرگەننىڭ اندەرى شىرقالدى. ولاردىڭ كەيبىرەۋى باحاسا تىلىندە ورىندالدى. دجاكارتادا ديماش ونەرىنىڭ جانكۇيەرلەرى ءوز فان-كلۋبىنىڭ مەرەيتويىن اتاپ ءوتتى. "ديماش قازاقستاننىڭ التىن داۋىسى" اتتى شارا ۇلتتىق كىتاپحانادا ۇيىمداستىرىلدى. 2017 جىلدىڭ مامىر ايىندا قۇرىلعان فان-كلۋب قاتارىندا 10 مىڭعا جۋىق ادام بار. كەيبىرەۋى قازاق ءتىلىن ۇيرەنىپ العان. جانكۇيەرلەرىنىڭ ءبىرى "ەڭلىك-كەبەك" پوەماسىنىڭ قىسقا نۇسقاسىن وقىپ بەرىپ، ونى مۇحتار اۋەزوۆتىڭ 125 جىلدىعىنا ارنادى.
«مەنىڭ جاسىم 62-دە. قازاق ءتىلىن ۇيرەنگەنىمە التى اي بولدى. ديماشتىڭ داۋىسىن ەستىگەننەن كەيىن قازاق تىلىنە دەگەن سۇيىسپەنشىلىگىم اشىلدى. بارا-بارا قازاق جازۋشىلارى مەن اقىندارى تۋرالى زەرتتەي باستادىم»،– دەيدى فان-كلۋب مۇشەسى تيتا سريۆاحۋني كوسساتيتا.
DID فان-كلۋبىنىڭ توراعاسى دەستري اريانانىڭ ايتۋىنشا، باستاپقى كەزدە نەبارى 5-10 ادام جينالعان.
«الەۋمەتتىك جەلىلەردە بەلسەندى ناۋقان وتكىزىپ، كافەلەردە كەزدەسىپ جۇردىك. بىرتىندەپ قاتىسۋشىلار سانى 10 مىڭنان استى. ديماش قۇدايبەرگەنگە سۇيىسپەشىلىگىمىزدىڭ ارقاسىندا قازاق مادەنيەتىمەن جاقىنىراق تانىستىق»،– دەدى ول.
