Djakarta qalasynda Dımash Qudaıbergenniń jankúıerleri jınalyp, fan-klýbtyń 5 jyldyǵyn atap ótti. Onyń qatarynda 10 myńdaı adam bar, dep habarlaıdy «Adyrna» tilshisi «Habar 24»-ke silteme jasap.
Bul kezdesýdi Indonezııanyń ulttyq kitaphanasy men Qazaqstan elshiligi uıymdastyrdy. Dımash jankúıerleri onyń ánderin oryndap, Qazaqstan mádenıetimen jaqynyraq tanysýǵa múmkindik aldy. Indonezııa astanasynda Dımash Qudaıbergenniń ánderi shyrqaldy. Olardyń keıbireýi bahasa tilinde oryndaldy. Djakartada Dımash óneriniń jankúıerleri óz fan-klýbynyń mereıtoıyn atap ótti. "Dımash Qazaqstannyń altyn daýysy" atty shara Ulttyq kitaphanada uıymdastyryldy. 2017 jyldyń mamyr aıynda qurylǵan fan-klýb qatarynda 10 myńǵa jýyq adam bar. Keıbireýi qazaq tilin úırenip alǵan. Jankúıerleriniń biri "Eńlik-Kebek" poemasynyń qysqa nusqasyn oqyp berip, ony Muhtar Áýezovtiń 125 jyldyǵyna arnady.
«Meniń jasym 62-de. Qazaq tilin úırengenime alty aı boldy. Dımashtyń daýysyn estigennen keıin qazaq tiline degen súıispenshiligim ashyldy. Bara-bara qazaq jazýshylary men aqyndary týraly zertteı bastadym»,– deıdi fan-klýb múshesi Tıta Srıvahýnı Kossatıta.
DID fan-klýbynyń tóraǵasy Destrı Arıananyń aıtýynsha, bastapqy kezde nebári 5-10 adam jınalǵan.
«Áleýmettik jelilerde belsendi naýqan ótkizip, kafelerde kezdesip júrdik. Birtindep qatysýshylar sany 10 myńnan asty. Dımash Qudaıbergenge súıispeshiligimizdiń arqasynda qazaq mádenıetimen jaqynyraq tanystyq»,– dedi ol.
