الماتىداعى اتىشۋلى "التىن وردا" بازارىنىڭ توڭىرەگىندەگى داۋ باسىلار ەمەس. قوعام بەلسەندىلەرى ءساۋىر ايىندا باسشىلىق اۋىسقانىمەن، ساۋدا ورنىندا زاڭ بۇزۋشىلىقتار تولاستاماي وتىرعانىن ايتتى، دەپ حابارلايدى "ادىرنا" ۇلتتىق پورتالى "Stan.kz"-كە سىلتەمە جاساپ.
نۇر-سۇلتاندا باق وكىلدەرىنىڭ ساۋالىنا جاۋاپ بەرگەن زاڭگەر داۋرەن عابدۋل كورشى ەلدەردەن كەلگەن توپتار بازاردى وزدىگىنشە ءبولىپ الىپ، بيلىگىن جۇرگىزەتىنىن ايتادى. ونداعى ۇنەمى جازاسىز قالاتىن ۇرلىق-قارلىق پەن قولدان جاسالعان قىمباتشىلىققا وسى توپتاردىڭ قاتىسى بار دەيدى ول.
"بۇل شاعىن ساۋدا ورنى ەمەس، ءىرى لوگيستيكالىق توراپ. الماتى، الماتى وبلىسىن قامتاماسىز ەتىپ وتىرعان ساۋدا ورنى. بۇل كەم دەگەندە 3 ميلليون تۇتىنۋشىسى بار ستارتەگيالىق نىسان. ەگەر ول جەردىڭ جۇمىسىندا اقاۋ بولسا، بۇل ارقايسىمىزدىڭ ۇستەلىمىزدەگى نانىمىزعا، جەپ وتىرعان ەتىمىزگە دەيىن اسەر ەتەدى. سوندىقتان "التىن وردانىڭ" تاعدىرى ارقايسىمىزدى الاڭداتۋى كەرەك", – دەدى داۋرەن عابدۋل.
زاڭگەردىڭ سوزىنشە، وسىدان 3 اي بۇرىن كەلگەن جاڭا قوجايىن بازاردىڭ ورتاداعى ادامداردىڭ قاتىسۋىمەن كوتەرىلەتىن باعالارعا قاتىستى بىلىقتارىن جويۋعا ۋادە ەتكەن.
"التىن وردانىڭ" بۇرىنعى قۇرىلتايشىلارىنىڭ ۇستىنەن 2017 جىلى بازاردى رەيدەرلىك جولمەن تارتىپ الدى دەگەن ارىز تۇسكەن بولاتىن. قازىر ساۋدا ورىننىڭ ەكس باسشىلارى بيزنەس وشاعىن قايتارىپ الماقشى. ءساۋىر ايىنان باستاپ التىن وردادا باعا تومەندەدى مە؟ حالىق ونى سەزىنە الدى ما؟ ءبىز نەنى كۇتتىك؟ بازاردىڭ باسشىلىعى اۋىسىپ، ءبارى وزگەرەدى، جالعا الۋشىلار جاقسى ءومىر سۇرە باستايدى، تاۋارلاردىڭ باعاسى تۇسەدى دەپ ويلادىق. قوعام ارقىلى ءتارتىپ ورناتۋعا مىندەتتىمىز. سەبەبى، باسشىلىقتىڭ اۋىسقانىنىڭ ءوزى ۇلكەن كۇمان تۋعىزادى", – دەيدى زاڭگەر.
ساۋداگەرلەر تاراپىنان دا كوپتەگەن شاعىم ءتۇسىپ جاتقان كورىنەدى. ولار "التىن وردانىڭ" قازىرگى قوجايىنى ءتيىستى جۇمىستاردى جۇرگىزە الماي جاتقانىن ايتقان. ال كومپانيادا 95 پايىز ۇلەسى بار استاناداعى ەكونوميكالىق تەرگەۋ دەپارتامەنتىنىڭ بۇرىنعى قىزمەتكەرى ەركەبۇلان ءحامزيننىڭ قۇرىلتايشىلار قۇرامىنا قالاي كىرگەنى بەلگىسىز دەيدى زاڭگەر.
زاڭسىزدىقتاردى تىزگەن عابدۋل بۇل ماسەلەلەرگە بازاردىڭ قازىرگى يەلەرى جاۋاپ بەرىپ، ءتارتىپ ورناتۋعا مىندەتتى دەپ وتىر.
