الماتى قالاسىنىڭ تۇرعىنى ازا دولگيەۆا قازاقستانعا عانا ەمەس، تمد-عا تانىمال او لاتتە «راحات» كونديتەرلىك فابريكاسىندا جۇمىس ىستەپ ءجۇرىپ ءبىر قولىنان ايىرىلعان. قايعىلى وقيعا وتكەن جىلدىڭ 22 جەلتوقسانىندا بولعان. 47 جاستاعى ايەل ءوندىرىس كەزىندە 5 توننالىق شوكولاد ارالاستىراتىن ماشيناعا ابايسىزدا قولىن سالىپ، كونۆەيەر بىلەگىن كەسىپ تۇسكەن، دەپ حابارلايدى «ادىرنا» ۇلتتىق پورتالى «Azattyq Rýhy» سايتىنا سىلتەمە جاساپ.
«قولىمداعى شۇبەرەك ابايسىزدا كونش-ماشيناعا ءتۇسىپ كەتتى. سول كەزدە اپپارات ءوزى توقتاپ تۇر دەپ ويلاپ شۇبەرەكتى الماقشى بولعانىمدا بىلەگىم پىشاقتىڭ استىندا قالدى. اۋرۋحانادا قولىما امپۋتاتسيا جاسادى. قازىر ءۇشىنشى توپ مۇگەدەگىمىن. دەنساۋلىعىم 50% جۇمىسقا جارامسىز. قولىم ءالى كۇنگە دەيىن قاقساپ اۋىرادى. 3-4 ايدان بەرى قولىمدى قيمىلداتىپ، جوعارى كوتەرە المايمىن. قايعىلى وقيعا كەزىندە باسشىلىق ەم-دومعا قاجەتتى شىعىنداردىڭ ءبارىن كوتەرىپ الامىز، قاجەت بولسا پروتەز سالىپ بەرەمىز دەپ ۋادە ەتكەن. ودان بەرى جەتى اي ءوتتى، جاقىندا عانا ەمگە دەپ 1 ميلليون تەڭگە بەردى. بۇل بولماشى قاراجات ەمىمە كەتەتىن شىعىننىڭ جارتىسىن دا وتەمەيدى. جالعىز اسىراپ وتىرعان ەكى بالامنىڭ جاعداي نە بولماق؟!» – دەدى جابىرلەنۋشى ازا دولگيەۆا.
ادۆوكات اننا دميتريەۆيچ اتالعان جاعدايدا كىنانىڭ 80%-ى جۇمىس بەرۋشىنىڭ موينىندا دەيدى.
«كومپانيا و باستا قىزمەتكەرلەرىن قولداۋسىز قالدىرمايتىنىن اۋىزشا ايتقان. زاڭ بويىنشا دا بار شىعىندى جۇمىس بەرۋشى وتەۋى كەرەك. بىراق جارتى جىلدان بەرى ولار ازاعا قولداۋ جاساماعان. ازا ەندى كومپانياعا پروتەزگە مۇقتاج ەكەنىن قۇجات جۇزىندە دالەلدەۋى كەرەك ەكەن. ونىڭ قولىنا پروتەز كەرەك ەكەنى كوزى بار ادامعا كورىنىپ تۇر ەمەس پە؟! 47 جاستا مۇگەدەك بولىپ، جۇمىسقا جارامسىز بولىپ قالۋدىڭ قانداي قيىن ەكەنىن ويلاۋدىڭ ءوزى اۋىر. ال باسشىلىق بولسا كومەككە مۇقتاج ادامدى ىستەن شىعىپ قالعان زات سەكىلدى لاقتىرا سالعان»، - دەدى ادۆوكات اننا.
كومپانيانىڭ پيار مامانى ناتاليا تيموششۋكتىڭ حابارلاۋىنشا، جابىرلەنۋشىگە ءتيىستى كومەك تولىقتاي كورسەتىلەتىن بولادى. بىراق جارتى جىلدان بەرى كەلىنشەككە كومەك كورسەتپەۋلەرىنىڭ سەبەبىن تۇسىندىرمەدى.
«ءبىز جازاتايىم وقيعا 2021 جىلدىڭ 22 جەلتوقسانىندا ازا دولگيەۆامەن بولعانىن راستايمىز. كومپانيا زاۋىتتا ءوندىرىس قىزمەتكەرلەرى ءۇشىن ونەركاسىپتىك قاۋىپسىزدىك جانە ەڭبەكتى قورعاۋ بويىنشا تۇراقتى نۇسقاۋلىق وتكىزىپ، وندىرىستەگى وسىنداي جاعدايلاردان اۋلاق بولۋعا تىرىسادى. ازا كومپانيا قىزمەتكەرى بولىپ قالادى جانە جاراقات العان ساتتەن باستاپ وعان تولىق كولەمدە ەڭبەككە جارامسىزدىق پاراعى تولەنەدى (ورتاشا جالاقىدان 100%), سونداي-اق وعان ۇجىمدىق شارتقا سايكەس باستاپقى مۇقتاجدىقتارى ءۇشىن 1 000 000 تەڭگە مولشەرىندە ماتەريالدىق كومەك كورسەتىلدى.
ازا جۇمىسقا قايتا كىرىسۋگە دايىن بولعان كەزدە، وعان بۇرىنعى لاۋازىمنان تومەن ەمەس ەڭبەكاقى تولەۋ شارتتارى، جەڭىل ەڭبەك جاعدايلارى بار پوزيتسيا بەرىلەدى. بۇدان باسقا، وعان ناقتى مولشەرىن ساقتاندىرۋ كومپانياسى ايقىندايتىن اي سايىنعى ساقتاندىرۋ تولەمدەرى تاعايىندالاتىن بولادى. كومپانيا پروتەزدى ساتىپ الۋعا ماتەريالدىق كومەك كورسەتەدى. سونىمەن قاتار، ءبىز بالالاردى جوعارى وقۋ ورىندارىندا ءارى قاراي جۇمىسقا ورنالاستىرۋ مۇمكىندىگىمەن كاسىپورىن قاراجاتى ەسەبىنەن وقىتۋعا ۇزاق مەرزىمدى مىندەتتەمە الامىز»، - دەدى مامان.
جازاتايىم وقيعالار كەزىندە جۇمىسكەرلەردىڭ قۇقىقتارىن قورعاۋ ماقساتىندا «لوتتە راحات» اق جىل سايىن مىندەتتى ساقتاندىرۋ شارتتارىن جاسايتىندارىن العا تارتتى.
«ادىرنا» ۇلتتىق پورتالى
