Almaty qalasynyń turǵyny Aza Dolgıeva Qazaqstanǵa ǵana emes, TMD-ǵa tanymal AO LATTE «Rahat» kondıterlik fabrıkasynda jumys istep júrip bir qolynan aıyrylǵan. Qaıǵyly oqıǵa ótken jyldyń 22 jeltoqsanynda bolǵan. 47 jastaǵy áıel óndiris kezinde 5 tonnalyq shokolad aralastyratyn mashınaǵa abaısyzda qolyn salyp, konveıer bilegin kesip túsken, dep habarlaıdy «Adyrna» ulttyq portaly «Azattyq Rýhy» saıtyna silteme jasap.
«Qolymdaǵy shúberek abaısyzda konsh-mashınaǵa túsip ketti. Sol kezde apparat ózi toqtap tur dep oılap shúberekti almaqshy bolǵanymda bilegim pyshaqtyń astynda qaldy. Aýrýhanada qolyma ampýtaııa jasady. Qazir úshinshi top múgedegimin. Densaýlyǵym 50% jumysqa jaramsyz. Qolym áli kúnge deıin qaqsap aýyrady. 3-4 aıdan beri qolymdy qımyldatyp, joǵary kótere almaımyn. Qaıǵyly oqıǵa kezinde basshylyq em-domǵa qajetti shyǵyndardyń bárin kóterip alamyz, qajet bolsa protez salyp beremiz dep ýáde etken. Odan beri jeti aı ótti, jaqynda ǵana emge dep 1 mıllıon teńge berdi. Bul bolmashy qarajat emime ketetin shyǵynnyń jartysyn da ótemeıdi. Jalǵyz asyrap otyrǵan eki balamnyń jaǵdaı ne bolmaq?!» – dedi jábirlenýshi Aza Dolgıeva.
Advokat Anna Dmıtrıevıch atalǵan jaǵdaıda kinániń 80%-y jumys berýshiniń moınynda deıdi.
«Kompanııa o basta qyzmetkerlerin qoldaýsyz qaldyrmaıtynyn aýyzsha aıtqan. Zań boıynsha da bar shyǵyndy jumys berýshi óteýi kerek. Biraq jarty jyldan beri olar Azaǵa qoldaý jasamaǵan. Aza endi kompanııaǵa protezge muqtaj ekenin qujat júzinde dáleldeýi kerek eken. Onyń qolyna protez kerek ekeni kózi bar adamǵa kórinip tur emes pe?! 47 jasta múgedek bolyp, jumysqa jaramsyz bolyp qalýdyń qandaı qıyn ekenin oılaýdyń ózi aýyr. Al basshylyq bolsa kómekke muqtaj adamdy isten shyǵyp qalǵan zat sekildi laqtyra salǵan», - dedi advokat Anna.
Kompanııanyń pıar mamany Natalıa Tımoýktyń habarlaýynsha, jábirlenýshige tıisti kómek tolyqtaı kórsetiletin bolady. Biraq jarty jyldan beri kelinshekke kómek kórsetpeýleriniń sebebin túsindirmedi.
«Biz jazataıym oqıǵa 2021 jyldyń 22 jeltoqsanynda Aza Dolgıevamen bolǵanyn rastaımyz. Kompanııa zaýytta óndiris qyzmetkerleri úshin ónerkásiptik qaýipsizdik jáne eńbekti qorǵaý boıynsha turaqty nusqaýlyq ótkizip, óndiristegi osyndaı jaǵdaılardan aýlaq bolýǵa tyrysady. Aza kompanııa qyzmetkeri bolyp qalady jáne jaraqat alǵan sátten bastap oǵan tolyq kólemde eńbekke jaramsyzdyq paraǵy tólenedi (ortasha jalaqydan 100%), sondaı-aq oǵan ujymdyq shartqa sáıkes bastapqy muqtajdyqtary úshin 1 000 000 teńge mólsherinde materıaldyq kómek kórsetildi.
Aza jumysqa qaıta kirisýge daıyn bolǵan kezde, oǵan burynǵy laýazymnan tómen emes eńbekaqy tóleý sharttary, jeńil eńbek jaǵdaılary bar pozıııa beriledi. Budan basqa, oǵan naqty mólsherin saqtandyrý kompanııasy aıqyndaıtyn aı saıynǵy saqtandyrý tólemderi taǵaıyndalatyn bolady. Kompanııa protezdi satyp alýǵa materıaldyq kómek kórsetedi. Sonymen qatar, biz balalardy joǵary oqý oryndarynda ári qaraı jumysqa ornalastyrý múmkindigimen kásiporyn qarajaty esebinen oqytýǵa uzaq merzimdi mindetteme alamyz», - dedi maman.
Jazataıym oqıǵalar kezinde jumyskerlerdiń quqyqtaryn qorǵaý maqsatynda «Lotte Rahat» AQ jyl saıyn mindetti saqtandyrý sharttaryn jasaıtyndaryn alǵa tartty.
«Adyrna» ulttyq portaly
