باس پروكۋراتۋرانىڭ قىلمىستىق قۋدالاۋ قىزمەتىنىڭ باسشىسى سەرىك شالاباەۆ «ديكي ارمان» لاقاپ اتىمەن تانىمال ارمان جۇماگەلديەۆكە قاتىستى تەرگەۋ ماتەريالدارىن جاريالادى، دەپ حابارلايدى «ادىرنا» ءتىلشىسى.
«قىلمىستىق ورتادا ارمان جۇماگەلديەۆ پەن ونىڭ سىبايلاستارى ەرەكشە ءرول اتقاردى. ولار 6 قاڭتار كۇنى الماتىداعى «قازاقستان» قوناق ۇيىنە كەلگەن قىلمىسكەرلەرگە «Glock» جəنە «ماكاروۆ» ماركالى تاپانشالاردى تاراتقان، ءارى نۇسقاۋ بەرىپ وتىرعان. سىبايلاستارىن 10 توپقا ءبولىپ، جوسپارلانعان قىلمىستارداعى رولدەرىن انىقتادى. سونداي-اق قارۋلى قىلمىسكەرلەر توبى شاھاردىڭ ءəرتۇرلى نۇكتەلەرىنەن 24 ازاماتتى ۇرلاپ، ولاردى ۇرىپ-سوققان. كەيىن «Ritz Carlton» جəنە «قازاقستان» قوناق ۇيلەرىنىڭ پاركينگتەرىندە ۇستاعاندارى بەلگىلى بولدى. وسى قىلمىستاردى جاساعانى ءۇشىن 40 كۇدىكتى قاماۋعا الىندى»،– دەدى ول.
