قازاقستان رەسپۋبليكاسى مادەنيەت جانە سپورت مينيسترلىگى مەن ءۇندىستان مادەنيەت مينيسترلىگى اراسىندا 2022-2025 جىلدارعا ارنالعان مادەني الماسۋ باعدارلاماسىنا قول قويىلدى. قول قويۋ ءراسىمى قر مادەنيەت جانە سپورت ءمينيسترى داۋرەن اباەۆ پەن ءۇندىستاننىڭ مەملەكەتتىك سىرتقى ىستەر جانە مادەنيەت ءمينيسترى مەەناكشي لەكحي حانىممەن ەكىجاقتى كەزدەسۋ بارىسىندا ءوتتى، دەپ حابارلايدى «ادىرنا» ءتىلشىسى.
داۋرەن اباەۆ بيىل قازاقستان مەن ءۇندىستان اراسىنداعى ديپلوماتيالىق قاتىناستاردىڭ ورناعانىنا 30 جىل تولاتىنىن اتاپ ءوتتى. ونىڭ ايتۋىنشا، نيۋ-دەليدە ۇلى اقىن جانە اعارتۋشى اباي قۇنانبايۇلىنىڭ ءبيۋستىنىڭ اشىلۋى بەرىك جانە دوستىق قارىم-قاتىناستاردىڭ ايعاقتارىنىڭ ءبىرى بولدى. سونىمەن قاتار، نۇر-سۇلتان قالاسىندا ماحاتما گانديگە ەسكەرتكىش اشۋ جوسپارلانعان.
سونداي-اق، داۋرەن اباەۆ كينەماتوگرافيا، مۇراعات ءىسى، تۋريزم جانە سپورت سالاسىنداعى ىنتىماقتاستىقتى جانداندىرۋعا قىزىعۋشىلىق تانىتتى. اتاپ ايتقاندا، مينيستر ءۇندى كينەماتوگرافيستەرىن «ەۋرازيا» حالىقارالىق كينوفەستيۆالىنە قاتىسۋعا شاقىردى.
ءوز كەزەگىندە مەەناكشي لەكحي كەڭ اۋقىمدى ماسەلەلەر بويىنشا ءوزارا ءتيىمدى بايلانىستاردى نىعايتۋعا نيەتىن راستادى.
