پەتروپاۆلدا ساياسي قۋعىن-سۇرگىنگە ۇشىراعان مۇقاش قابديروۆ بەس جىلدان بەرى ادىلدىك ىزدەپ ءجۇر. مەملەكەتتەن بەرىلۋى ءتيىس ءۇش بولمەلى باسپانانىڭ ورنىنا قالا اكىمدىگى ءبىر بولمەلى ءۇي بەرگەن. قازىر ونىڭ ءوزىن كەرى قايتارىپ الماق، دەپ حابارلايدى "ادىرنا" ۇلتتىق پورتالى "حابار 24" ارناسىنا سىلتەمە جاساپ.
قاريا امالسىز سوتقا جۇگىندى. مۇقاش قابديروۆ زارلى زاماننىڭ زاردابىن تارتقان ازامات. ساياسي قۇعىن-سۇرگىن جىلدارى اناسىن كاۆكازدان قازاقستانعا جەر اۋدارعان. كوپ جىلدار بويى ولار ارنايى كومەنداتۋرادا ەسەپتە تۇرىپ، سولاقاي ساياساتتىڭ قاسىرەتىن كورگەن. بىراق ۋاقىت وتە كەلە اقتالعان. ەلىمىزدە قابىلدانعان زاڭعا سايكەس، مۇنداي جاندار تۇرعىن ءۇي جاعدايىن جاقسارتۋعا مۇقتاج بولسا، كەزەكتەن تىس باسپانا الۋعا قۇقىلى. سوندىقتان 2017 جىلى وتباسىمەن اكىمدىككە كەزەككە تۇرعان.
-ءۇش جىل قوزعالىس جوق. بارىپ سۇراسام «قارايمىز، قارايمىز» دەيدى. ەندى 2020 جىلى قايتادان ارىز جازدىم. نەگە ماعان پاتەر بەرمەيسىڭدەر دەپ. ايتا بەرسەڭ ونىڭ اڭگىمەسى كوپ. ولار جوعالىپ كەتتى، ءۇيتتى-ءبۇيتتى دەپ، تاعى سوزا باستادى. سوسىن اقىرىندا 2020 جىلى 21 قازاندا ماعان تۇرعىن ءۇي كوميسسسيانىڭ شەشىمىمەن 1 بولمەلى ءۇي بەرەدى، - دەيدى پەتروپاۆل قالاسىنىڭ تۇرعىنى مۇقاش قابديروۆ.
قابديروۆتار وتباسىنا ءۇش بولمەلى پاتەر بەرىلۋى ءتيىس ەدى. ونىڭ ۇستىنە قالالىق اكىمدىكتەگىلەر باسپانانى تەك جالعا بەرگەن. ءالى كۇنگە ءۇيدىڭ ەش قۇجاتى جوق. سوندىقتان ادىلدىك ىزدەگەن مۇقاش اقساقال سوتقا جۇگىنگەن.
-9 اي مەنىڭ ارىزىما نە تەلەفونىما جاۋاپ بەرمەدى. سوسىن امال جوق، سوتقا بەردىم. ءبىرىنشى سوت وتىرىسىندا شاعىمىمدى قولداماي، انا جاققا شىعىپ كەتتى سوت. سوسىن وبلىستىق سوتقا شاعىم جازدىق. وبلىستىڭ سوتىندا مەنىڭ قۋانىشىما وراي، شىنىندا دا مىناۋ ءبىرىنشى سوتتىڭ سۋدياسىنىڭ شەمىمى دۇرىس ەمەس. جاعدايى انىق جازىلماعان دەپ ونىڭ شەمىمىن جويدى دا، بىزگە، اكىمشىلىككە ۋاقىت بەردى، - دەيدى مۇقاش قابديروۆ.
72 جاستاعى قاريانىڭ ماسەلەسى ءالى شەشىلەر ەمەس. ەندى اكىمدىكتەگىلەر اقساقالعا بەرگەن ءۇيدى قايتارىپ الماق.
-ءيا، زاڭ بار. ول 1993 جىلى قابىلداندى. ياعني مەملەكەت مۇنداي ازامتتاردى بارىنشا قولدايدى. بىراق جەرگىلىكتى جەرلەردە بۇل تاپسىرما ورىندالماي وتىر. قاجەتتى قۇجاتتاردىڭ بارلىعى بار. سوندىقتان قازىر ءبىز جوعارعى سوتقا ارىز دايىنداپ جاتىرمىز، - دەيدى ادۆوكات ەلەنا يگناتەنكو.
ال اتالعان ماسەلە بويىنشا قالالىق اكىمدىك وكىلدەرى سۇحبات بەرۋدەن باس تارتتى. ايتۋلارىنشا، ماسەلەنىڭ اق-قاراسىن سوت شەشۋگە ءتيىس.
"ادىرنا" ۇلتتىق پورتالى
