اسحات ايماعامبەتوۆ مىرزا! بىرىڭعاي مەكتەپ فورماسىن بەكىتىپ، نۇكتەسىن قويۋعا نە كەدەرگى؟
1) كەيبىر اتا-انالار مەكتەپكە بالالارىن جىبەرمەيدى دەگەن جەلەۋ ەمەس. بالانىڭ ءبىلىم الۋ قۇقىعىنان ايىرۋعا ەشكىمنىڭ حاقىسى جوق(مىڭ جەردەن اتا-اناسى بولسا دا). وعان ارنايى زاڭ بار قولدانىستا.
2) "ونلاين وقىتىپ جاتىرمىز دەپ، شىندىعىندا ەشقانداي وقىتىپ جاتقان جوق. ءبىلىم الماي جاتقان قىزداردىڭ سانى ارتۋدا" دەگەن نە ساندىراق؟ بۇل نە سوندا؟! ۆاحابيستتەر قىزدارىن مەكتەپكە جىبەرمەۋىنەن قورقىپ، سولاردىڭ ىعىنا جىعىلۋ ما؟
3) مەملەكەتتىك ۇستانىم مەن ءبىلىم بەرۋ وردالارىنداعى ىشكى ءتارتىپ --- ءار تۇسىنىكتەگى توپتاردىڭ تالاپتارىنا قاراي ويىسا بەرەتىن بولسا، بۇل قانداي مەملەكەتتىك ۇستانىم؟
4) ءار توپتىڭ قالاعانىن زاڭداستىرىپ بەرۋ ارقىلى ماسەلەنى شەشەمىن دەسەڭىز قاتتى قاتەلەسەسىز. ونىڭ بولاشاقتاعى سالدارى بۇگىنگىدەن دە قاتتى ۋشىعۋى مۇمكىن. ەرتەڭ كاتوليكتەر ءوز فورماسىمەن جىبەرەمىز دەپ، سيونيستتەر مەن بۋدديستتەر، كريشنالار مەن ساتانيستتەر دە ءوز تالاپتارىن قويسا شە؟ ول كەزدە قالاي شەشپەكسىزدەر ماسەلەنى؟!
بىرىنە رۇحسات بەرىپ، ەكىنشىلەرىنە رۇحسات بەرمەۋگە قانداي ءۋاج ايتپاقسىزدار؟ وزگەلەرگە رۇحسات بەرمەسەڭىزدەر، ۆاحابو-ساليافيتتەردىڭ ءلوببيستى بولىپ شىعا كەلەتىندەرىڭىز ويلانتپايدى ما سىزدەردى؟ بولاشاقتا ءوز تۇسىنىكتەرىنىڭ ۇستەمدىك قۇرۋلارىنا بالالاردى قارۋ(قالقان) ەتۋلەرىنە جول اشىپ وتىرعاندارىڭىزدى تۇسىنبەي وتىرسىزدار ما؟ الدە، تۇسىنبەگەن بولىپ، سونداي توپتاردىڭ ىقپالىنان شىعا الماي وتىرسىزدار ما؟
مەنىڭ تالابىم: مەكتەپتە ءبىر عانا مەكتەپ فورماسى بەكىتىلسىن. بولدى سونىمەن. وعان كونبەگەندەرمەن قۇقىق قورعاۋ ورگاندارى اينالىسسىن. ەگەر دە، "سولقىلداق" زاڭدارىمىز بولسا، سول زاڭداردىڭ "سولقىلداقتىعىن" جوياتىن زاڭ جوباسىن قر ءبىلىم جانە عىلىم مينيسترلىگى دايىنداپ پارلامەنتكە ۇسىنىڭىزدار. مەكتەپ فورماسى مەن ۇلتتىق تاربيە ءبىر-بىرىنەن ءبولىپ قاراۋعا كەلمەيتىن، ۇلتتىق يدەولوگيانىڭ ءبىر تارماعى. ءبىزدىڭ ۇلتتىق يدەولوگيامىزعا قاتىستى دۇنيەلەردى ءسىزدىڭ مينيستىرلىكتىڭ ءبىر شەشىمدەرىمەن وزگە ءبىر توپتاردىڭ ىعىنا جىعىپ بەرۋگە حاقىلارىڭىز جوق!
بۇل ماسەلەنى شەشۋ سىزدەرگە قيىندىق تۋدىرىپ، امالسىزدان ولاي-بۇلاي بۇلعاقتاپ جاتساڭىزدار، وندا، بىرىڭعاي مەكتەپ فورماسىن بەكىتۋدى پارلامەنتتىڭ تالقىلاۋىنا ۇسىنىپ باستارىڭىزدى بۇل ماسەلەدەن اراشالاپ الىڭىزدار. بۇل ماسەلە سول دەڭگەيدە بەكىتىلۋى كەرەك. سوندا، سىزدەر تەك بەكىتىلگەن بىرىڭعاي مەكتەپ فورماسىمەن ءبىلىم الۋلارىن قامتاماسىز ەتەتىن بولاسىزدار. مۇنداي ماسەلەنى سىزدەردىڭ قۇرعان كوميسسيالىق شەشىمدەرىڭىزدىڭ قۇزىرەتى جالپى حالىقتىق ۇستانىمعا قارسى تۇرا المايدى. ىشكى كوميسسيالارىڭىزبەن ىشكى تەحنيكالىق ماسەلەلەرىڭىزدى شەشە بەرىڭىزدەر.
مەنىڭ ۇسىنىسىم: بۇل ماسەلەنى قر پارلامەنتىنىڭ ءماجىلىسى مەن قر پارلامەنتىنىڭ سەناتى وتىرىسىندا تالقىلانىپ، سول دەڭگەيدە شەشىلۋى كەرەك. ءتىپتى، ول جاققا ۇسىنىستى ازىرلەۋدى قر پرەمەر-ءمينيسترى تىكەلەي ءوز باقىلاۋىنا الۋى كەرەك.
بولماسا، سىزدەردىڭ مىنا ىستەرىڭىز "بەلىڭ كوتەرە المايتىن شوقپاردى بىلەگىنە بايلاۋ" سەكىلدى كورىنىس.
"ادىرنا" ۇلتتىق پورتالى
