الماتىداعى بالمۇزداق جانە ءسۇت ونىمدەرىن شىعاراتىن زاۋىتتا اممياك توگىلىپ، جۇمىسشىلار ۋلانىپ قالدى. 5 ادام دەرەۋ اۋرۋحانا جەتكىزىلگەن ولاردىڭ ءومىرى ءۇشىن دارىگەرلەر كۇرەسىپ جاتىر، دەپ حابارلايدى "ادىرنا" ۇلتتىق پورتالى "استانا" ارناسىنا سىلتەمە جاساپ.
اق حالاتتىلار 26, 46 جانە 38 جاستاعى ءۇش ناۋقاستىڭ ءحالىن اۋىر دەپ باعالاۋدا. ۇشەۋى دە جانساقتاۋ بولىمىنە جاتىر.
"بەس ناۋقاستىڭ بىرەۋى ستاتسيونارلىق ەمنەن باس تارتتى. جاعدايى تۇراقتى بولۋىنا بايلانىستى. ءتورت ناۋقاستىڭ ۇشەۋى قازىرگى تاڭدا رەانيماتسيا بولىمشەسىندە ەم الىپ جاتىر. جاعدايلارى اۋىر. تۇراقتى. قالعان ءبىر ناۋقاس تاكسيكيولوگيا بولىمىندە ەم قابىلداپ جاتىر. جاعدايى ورتاشا قالىپتى", -دەدى الماتى قالاسى جەدەل كومەك كورسەتۋ اۋرۋحاناسىنىڭ ءبولىم مەڭگەرۋشىسى باۋىرجان وماروۆ.
وقىس جاعداي بالمۇزداقتى بۋىپ-ءتۇيۋ كەزىندە بولعان. تەحنيكالىق اقاۋ شىعىپ، 500 گرامم اممياك توگىلگەن. سول ساتتە ىشتە 60-قا جۋىق جۇمىسشى بولعان. بارلىعى دەر كەزىندە سىرتقا شىعىپ ۇلگەرگەن. بىراق 5 قىزمەتكەردىڭ جاعدايى ناشارلاپتى.
زاۋىت باسشىلارى قازىر وقىس جاعدايدىڭ سەبەپ-سالدارىن انىقتاۋعا كىرىسكەن. ءارى ولار زارداپ شەككەن جۇمىسشىلارىنا 500 مىڭ تەڭگەنىڭ كولەمىندە وتەماقى تولەمەك.
"الدىن-الا قورىتىندى بويىنشا مۇزداتقىش تسەليندردىڭ رەزينكالىق تىعىزداعىشىنداعى احاۋىنان وسىنداي جاعداي بولىپ وتىر. قۇزىرلى مەملەكەتتىك ورگانداردىڭ تەكسەرۋىنە كومەكتەسۋگە دايىنبىز جانە بۇكىل اۋىسىمداعى قىزمەتكەرلەردى وسى وقيعا بولعان كەزدەگى تولىعىمەن مەديتسينالىق تەكسەرۋدەن وتكىزىلەدى. كەشەگى اۋىسىمدا دايىندالعان ونىمدەردى ساتىلىمنان قايتارىلادى", - دەيدى كومپانيانىڭ قوعاممەن بايلانىس ءبولىمى جەتەكشىسى بەيبىت قۇرمانباەۆ.
"ادىرنا" ۇلتتىق پورتالى
