قر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ۇكىمەت وتىرىسىندا سويلەگەن سوزىندە حالىقتى جۇمىسپەن قامتۋعا ارنالعان قوسىمشا شارالار تۋرالى ايتتى، دەپ حابارلايدى «ادىرنا» ءتىلشىسى.
ءسوزىنىڭ باسىندا مينيستر 2000 جىلداردان كەيىن دۇنيەگە كەلگەن ۇرپاقتىڭ ەسەيگەنىن، جىل سايىن وسىنداي 300 مىڭنان استام جاستىڭ ەڭبەك نارىعىنا قوسىلاتىنىن اتاپ ءوتتى. سونىڭ ناتيجەسىندە جۇمىس كۇشىنىڭ جاڭا ساپالىق قۇرىلىمى قالىپتاسىپ جاتىر. بۇگىندە جالپى جۇمىس كۇشىنىڭ 60 پايىزى ميللەنيالدار مەن Z بۋىننىڭ ەنشىسىندە.
وسى ءۇردىس قازىرگى كۇردەلى احۋال جانە الداعى ىقتيمال سىن-قاتەرلەر جۇمىسپەن قامتۋ ساياساتىن قايتا قاراۋ قاجەتتىگىن كورسەتىپ وتىر. وندا ازاماتتاردى جاي جۇمىسپەن قامتۋ ەمەس، شىن مانىندە ساپالى جۇمىس ورنىن بەرۋ ارقىلى حالىقتىڭ تابىسىن ارتتىرۋ باستى مىندەت بولماق.
ەڭ الدىمەن، بوس جۇمىس ورىندارىنا ونلاين جارمەڭكە وتكىزۋ ارقىلى جاستاردى ەڭبەكپەن قامتۋ قولعا الىنادى. ايتۋىنشا، ءار ايدىڭ 24-30 ارالىعىندا ەلەكتروندى ەڭبەك بيرجاسى نەگىزىندە بوس جۇمىس ورىندارىنىڭ ونلاين جارمەڭكەسى وتپەك.
«بيىل مامىر ايىندا ERG كومپانيالار توبىمەن بىرلەسىپ، ءبىلىم بەرۋ ۇيىمدارىنىڭ تۇلەكتەرىن جانە 35-كە دەيىنگى جاستاردى جۇمىسقا ورنالاستىرۋدىڭ ونلاين-جارمەڭكەسى پيلوتتىق رەجيمدە وتكىزىلدى. كومپانيا 350 جۇمىس ورنىن ۇسىندى. ءبىر اپتانىڭ ىشىندە جۇمىس بەرۋشىنىڭ تالاپتارىنا سايكەس كەلەتىن 159 جاس ىرىكتەۋدەن ءوتىپ، جۇمىسقا قابىلداندى. ەلەكتروندىق ەڭبەك بيرجاسى جانە ونىڭ نەگىزىندە تۇراقتى نەگىزدە وتكىزىلەتىن ونلاين بوس جۇمىس ورىندارى جارمەڭكەلەرى جۇمىس ىزدەۋشىلەر مەن جۇمىس بەرۋشىلەر ءۇشىن ەڭبەك نارىعىنىڭ اشىقتىعى مەن قولجەتىمدىلىگىن قامتاماسىز ەتۋدىڭ ماڭىزدى جانە ءتيىمدى قۇرالى بولادى»،– دەدى ول.
