انت قابىلداپ ۇلگەرمەي اۋىر ايىپ تاعىلعان اتىراۋلىق سارباز ايبولات امانجولوۆتىڭ اتا-اناسى ءادىل تەرگەۋدى تالاپ ەتەدى. ونى جامبىل وبلىسى قورداي اۋدانىنداعى اسكەري بولىمدە قايتىس بولعان ماڭعىستاۋلىق الىبەك قالبايدىڭ ولىمىنە كىنالى دەپ قاماۋعا العان، دەپ حابارلايدى «ادىرنا» ۇلتتىق پورتالى "كتك" ارناسىنا سىلتەمە جاساپ.
«ساربازدى سوققىعا جىقتى» دەپ ايىپ تاعىلعان اتىراۋلىق ايبولات امانجولوۆتىڭ اتا-اناسى ۇلدارى وتان الدىنداعى بورىشىن وتەۋگە كەتكەنىنە قۋانىپ انت قابىلداۋ كۇنىن اسىعا كۇتىپ جۇرگەن. الايدا ءدال سول اسكەري بولىمدە كۋرسانت الىبەك قالباي قايتىس بولدى دەگەن قايعىلى حابار كەلەدى. وسىدان كەيىن كوپ ۇزاماي ايبولات اتا-اناسىنا حابارلاسىپ الىبەكتىڭ ولىمىنە ءوزىن ايىپتاپ جاتقانىن ايتقان. مۇنى ەستىگەن اكە-شەشەسى الىپ ۇشىپ قوردايداعى اسكەري بولىمگە بارىپتى. بىراق قانشا وتىنگەنىمەن، بالاسىمەن كەزدەستىرمەگەن.
«ءبىزدى كىرگىزبەيدى، بالانى كورسەتپەيدى. بالانىڭ جۇرەگى اۋىرىپ، جۇرەكتىڭ ءدارىسىن ءىشىپ جاتىر دەيدى. ول نە ءدارى ەكەنىن دە بىلمەيمىز! قاسىنا 10 جىل وتىرىپ كەلگەن بىرەۋدى بىرگە وتىرعىزىپتى. ادۆوكات قاۋلىمەن تانىسسىن دەپ اپارىپ بەرگەن عوي. سولاردىڭ بارلىعىن اناۋ قاسىنداعى جىگىت وقىپ الىپ: «ايبولات، سەن مويىنداسايشى» دەيدى ەكەن»، - دەدى ايبولات امانجولوۆتىڭ اكەسى ازامات جۇماعازيەۆ.
ساربازدىڭ ءولىمى 22 ءساۋىر كۇنى تىركەلگەن. ال ەرتەسىندە اسكەري تەرگەۋشى قايتىس بولعان بالانى ايبولات امانجولوۆ ۇردى دەپ ايىپتاپ، بۇلتارتپاۋ قاۋلىسىن شىعارىپ قويعان. الايدا ون كۇننەن كەيىن قورعانىس مينيسترلىگىنىڭ تاربيە ءىسى مەن يدەولوگياعا جاۋاپتى ورىنباسارى سەرىك بورامباەۆ بۇقارالىق اقپارات قۇرالدارىنا «ماڭعىستاۋلىق سارباز الىبەك قالباي ساپتا تۇرعان جەرىندە ەسىنەن تانىپ قۇلاعان، دەنەسىندە جاراقات جوق، تاماقتان ۋلانۋى مۇمكىن» دەگەن اقپارات تاراتتى.
وسىلايشا مينيسترلىك پەن اسكەري ءبولىم تەرگەۋىنىڭ مالىمەتى ءبىر-بىرىمەن قابىسپاي، ەكى جاقتىڭ دا اتا-انالارىن اشىندىرىپ وتىر. تاۋەلسىز ساراپشىلار قايتىس بولعان ساربازدىڭ باسىنان قاتتى سوققى العانىن، ءىش-قۇرىلىسى زاقىمدانعان، دەنەسىندە بىردە-ءبىر زاقىم جوقتىعىن ايتقان. بۇل كاسىبي سپورتشى، نە وتە اۋىر سوققىدان بولاتىن جاراقات ەكەن. الايدا بۇل ساراپتامالاردى تەرگەۋ ماتەريالدارىنا قوسپاي وتىر دەيدى اشىنعان انا.
ايىپ تاعىلعان ايبولاتتىڭ اتا-اناسىنىڭ ايتارى كوپ. قورعانىس مينيسترلىگى ورىمدەي جاستارعا قورعان بولا الماي وتىرعانىنا نارازى. تەرگەۋدى جان-جاققا بۇرمالاپ وتىر دەگەن ولار جوعارعى ينستانتسيالاردىڭ بارلىعى جۇمىلىپ اقيقاتىن اشىپ، اسكەرگە ادىلەت ورناتسىن دەپ تالاپ ەتەدى.
«ادىرنا» ۇلتتىق پورتالى
