Ant qabyldap úlgermeı aýyr aıyp taǵylǵan atyraýlyq sarbaz Aıbolat Amanjolovtyń ata-anasy ádil tergeýdi talap etedi. Ony Jambyl oblysy Qordaı aýdanyndaǵy áskerı bólimde qaıtys bolǵan mańǵystaýlyq Álibek Qalbaıdyń ólimine kináli dep qamaýǵa alǵan, dep habarlaıdy «Adyrna» ulttyq portaly "KTK" arnasyna silteme jasap.
«Sarbazdy soqqyǵa jyqty» dep aıyp taǵylǵan atyraýlyq Aıbolat Amanjolovtyń ata-anasy uldary Otan aldyndaǵy boryshyn óteýge ketkenine qýanyp ant qabyldaý kúnin asyǵa kútip júrgen. Alaıda dál sol áskerı bólimde kýrsant Álibek Qalbaı qaıtys boldy degen qaıǵyly habar keledi. Osydan keıin kóp uzamaı Aıbolat ata-anasyna habarlasyp Álibektiń ólimine ózin aıyptap jatqanyn aıtqan. Muny estigen áke-sheshesi alyp ushyp Qordaıdaǵy áskerı bólimge barypty. Biraq qansha ótingenimen, balasymen kezdestirmegen.
«Bizdi kirgizbeıdi, balany kórsetpeıdi. Balanyń júregi aýyryp, júrektiń dárisin iship jatyr deıdi. Ol ne dári ekenin de bilmeımiz! Qasyna 10 jyl otyryp kelgen bireýdi birge otyrǵyzypty. Advokat qaýlymen tanyssyn dep aparyp bergen ǵoı. Solardyń barlyǵyn anaý qasyndaǵy jigit oqyp alyp: «Aıbolat, sen moıyndasaıshy» deıdi eken», - dedi Aıbolat Amanjolovtyń ákesi Azamat Jumaǵazıev.
Sarbazdyń ólimi 22 sáýir kúni tirkelgen. Al ertesinde áskerı tergeýshi qaıtys bolǵan balany Aıbolat Amanjolov urdy dep aıyptap, bultartpaý qaýlysyn shyǵaryp qoıǵan. Alaıda on kúnnen keıin Qorǵanys mınıstrliginiń tárbıe isi men ıdeologııaǵa jaýapty orynbasary Serik Borambaev buqaralyq aqparat quraldaryna «mańǵystaýlyq sarbaz Álibek Qalbaı sapta turǵan jerinde esinen tanyp qulaǵan, denesinde jaraqat joq, tamaqtan ýlanýy múmkin» degen aqparat taratty.
Osylaısha mınıstrlik pen áskerı bólim tergeýiniń málimeti bir-birimen qabyspaı, eki jaqtyń da ata-analaryn ashyndyryp otyr. Táýelsiz sarapshylar qaıtys bolǵan sarbazdyń basynan qatty soqqy alǵanyn, ish-qurylysy zaqymdanǵan, denesinde birde-bir zaqym joqtyǵyn aıtqan. Bul kásibı sportshy, ne óte aýyr soqqydan bolatyn jaraqat eken. Alaıda bul saraptamalardy tergeý materıaldaryna qospaı otyr deıdi ashynǵan ana.
Aıyp taǵylǵan Aıbolattyń ata-anasynyń aıtary kóp. Qorǵanys mınıstrligi órimdeı jastarǵa qorǵan bola almaı otyrǵanyna narazy. Tergeýdi jan-jaqqa burmalap otyr degen olar joǵarǵy ınstanııalardyń barlyǵy jumylyp aqıqatyn ashyp, áskerge ádilet ornatsyn dep talap etedi.
«Adyrna» ulttyq portaly
