رينات زايتوۆ سەنات توراعاسىنا ءۇش ماسەلەنى ايتتى

2430
Adyrna.kz Telegram

مامىرداعى كۇتپەگەن كەزدەسۋلەر تاعى دا ءبىر لاۋازىمدى تۇلعاعا جولىعۋمەن جالعاستى. بۇل جولعى كەزدەسۋدى مەن دە قاتتى كۇتكەنمىن. سەبەبى قازىرگى سەنات توراعاسى ۇلت پەن تىلگە، ءداستۇر مەن تاريحقا وتە جاقىن بولۋعا مىندەتتى. ويتكەنى ول قازاق ادەبيەتى مەن اقپاراتتىق قۇرالدارىنىڭ دامۋىنا جارتى عۇمىرىن ارناعان ساعات اشىمباەۆتىڭ ۇلى ماۋلەن ساعاتحانۇلى اشىمباەۆ. ءۇش ماسەلە بويىنشا عانا وي ايتۋعا مۇمكىندىك بولدى: ءبىرىنشى –قاڭتار وقيعاسىنا قاتىسقاندارعا (ۇيىمداستىرۋ ەمەس) امنيستيا جاريالاۋ. بۇل قازىرگى بيلىك پەن حالىقتىڭ تۇسىنىسۋىنە جىلدام جەتكىزەتىن جول.

ەكىنشى – ءتىل ماسەلەسى. اگاراكي شىنىمەن ءدال قازىر ءتىل مارتەبەسىن اتا زاڭمەن بەكىتۋ قازاقستاندا دا ۇلتارالىق قاقتىعىسقا اكەلۋى مۇمكىن بولسا، وندا ازىرگە مەملەكەتتىك ءتىلدى دامىتۋ اگەنتتىگىن قۇرۋ. ەگەردە مەملەكەتتىك ءتىلدى وقىتۋ، ناسيحاتتاۋ، ونىڭ مارتەبەسىن ءوسىرۋ بيلىك تاراپىنان قاداعالانىپ، قولداۋ كورسە، وندا ارى كەتسە 3-5 جىلدا قازاقستان اۆتوماتتى تۇردە جاپپاي قازاق تىلىندە سويلەيتىنىنە ابدەن سەنەمىن. ءۇشىنشىسى – بۇل مەنىڭ ەڭ ۇلكەن ارماندارىمنىڭ ءبىرى. الماتى قالاسىنىڭ ءال-فارابي كوشەسىندە جاڭادان بوي كوتەرگەن تەاتردى ۇلتتىق ءداستۇرلى ونەر تەاترى قىلۋ. تاۋەلسىزدىك العالى ەشقانداي ماردىمدى قولداۋ كورمەگەن ۇلتتىق ونەردىڭ تورگە شىعاتىن ۋاقىتى كەلدى! بۇل ويىممەن كەلىسپەيتىن ادام تابىلسا كەز-كەلگەن ۋاقىتتا پىكىر الماسۋعا دايىنمىن.

قىسقاشا ايتقاندا وسى. ماعان باسى جامان ەمەس سياقتى. قاڭتار وقيعاسىنان كەيىن بيلىك باسىنا ەلدىك پەن تاۋەلسىزدىكتى شىنىمەن قالايتىن ازاماتتار كەلە باستاعانداي. بۇيىرسا بەسىنشى ماۋسىمداعى رەفەرەندۋمنان كەيىن بۇدان دا جاقساراتىن شىعارمىز. قۇداي تىلەگىمدى قابىل ەتكەي. جول بولسىن اعالار. مويىندارىڭىزدا باتپان جۇك، الدارىڭىزدا ءبىرتالاي جۇمىس تۇر. ەرتەڭىن بۇگىنىنەن قىمبات كورەتىن قازاق سىزدەرگە ءۇمىت ارتتى. ال ونىڭ سالماعى جەڭىل ەمەس...

رينات ريفحاتۇلى زايتوۆ
ايتىسكەر اقىن، مادەنيەت سالاسىنىڭ ۇزدىگى، «الاتاۋ» ءداستۇرلى ونەر تەاترى ديرەكتورى

پىكىرلەر