ەلىمىزدەگى ءىرىلى-ۇساقتى عيماراتتاردا ءتۇرلى كونتسەرتتەر وتكىزىلىپ جاتادى. ونىڭ ىشىندە الىس-جاقىن شەتەلدەردەن دە كەلىپ، ەمىن-ەركىن ءوز كورسەتىلىمدەرىن حالىققا ۇسىنىپ جۇرگەندەرى از ەمەس. قويىلىم بارىسىندا اۋىزدارىنا كەلگەندى ايتىپ، انايى تىرلىكتەرىمەن جاستاردىڭ ساناسىن ۋلاپ جۇرگەندەردىڭ دە بار ەكەندىگىن، ادەپسىز ءىس-ارەكەتتەرىن كوزى قاراقتى اعايىن الەۋمەتتىك جەلىلەرگە جۇكتەلگەن ءتۇرلى ۆيدەولاردان كورىپ جۇرگەن بولار.
وسىلاردى كورىپ وسكەن ۇرپاقتان نە كۇتۋگە بولادى؟ كەيبىر باسىلىمدار مەن بلوگەرلەردىڭ «ۇيات» دەگەن ۇعىم-ءسوزدى قۇنسىزداندىرىپ، تەرىس ءىس-ارەكەتتى سىناپ، ۇيالتپاق بولعان ادامداردى «ۇياتمەن» اتاندىرىپ، مازاققا اينالدىرعان كۇنگە جەتتىك. ۇيالۋ قاسيەتىنەن ايىرىلعان ادام ادامي قاسيەتىنەن دە ايىرىلادى. قۇس ىلگەن قۋدىڭ ۇياتتا ءىسى بولمايتىندىعىنا كوزىمىز جەتىپ ءجۇر. قوعامداعى كەيبىرەۋلەردىڭ سانانى ۇلتسىزداندىرۋعا تىرىسىپ، ۇرپاقتى بولمىسىنان، ءداستۇرلى تاربيە نەگىزىنەن اجىراتۋعا ۇمتىلۋى – قاۋىپتى ءۇردىس.ۇلتتىق رۋحى تومەن ەلدىڭ بولاشاعى بۇلىڭعىر.
وسكەلەڭ ۇرپاقتىڭ نە كورىپ، كىمدى ۇلگى تۇتىپ جۇرگەنىن باقىلاۋسىز قالدىرۋعا استە بولمايدى!
مىسالى، مەملەكەتتىڭ كوپتەگەن سالالارىندا قاۋىپسىزدىكتى قامتاماسىز ەتىپ، باقىلاۋعا الاتىن تەحنيكالىق قاۋىپسىزدىك، سانەپيدەمستانتسيا، ت.ت سەكىلدى ءتۇرلى قۇرىلىمدار بار.
ال قوعامدىق سانانىڭ قاۋىپسىزدىگىن كىم باقىلايدى؟ ءوز بەتىمەن ساحناعا شىعىپ، كونتسەرت قويىپ جۇرگەندەردىڭ ءىس-ارەكەتتەرى ءۇشىن كىم جاۋاپ بەرەدى؟
كوپتەگەن ەلدەردە كونتسەرت ۇيىمداستىرۋدىڭ پروتسەدۋرالىق جولدارى وڭاي ەمەس. سان تەكسەرىستەن وتۋگە تۋرا كەلەدى. ورىندالاتىن شىعارمالاردىڭ ءمان-مازمۇنى سول ەلدىڭ مەملەكەتتىك يدەولوگياسىنا كەرەعار ەمەس پە، ساحناعا شىعاتىن ادامنىڭ رەپۋتاتسياسىندا كولەڭكەلى تۇستار بار ما، جوق پا – ءبارى باقىلانادى.
بىزدە دەموكراتيا، شىعارماشىلىق ەركىندىك دەگەن جەلەۋمەن جالعاندى جالپاعىنان باسىپ، ويىنا كەلگەنىن جاساپ، اۋىزىنا كەلگەنىن ايتىپ جاستاردىڭ ساناسىن ۋلاپ جۇرگەندەرگە بارلىق ەسىك اشىق بولىپ تۇر.
ەلىمىزدە جەكە تۇلعالار تاراپىنان وتكىزىلەتىن كونتسەرتتىك شارالاردى باقىلاۋعا الاتىن كەز كەلدى. قويىلاتىن كونتسەرتتەردىڭ مارشرۋتتىق باعىتىن بەلگىلەپ، رۇحسات بەرۋ فۋنكتسياسىن ەنگىزۋ قاجەت. بۇل مىندەتتەر جەرگىلىكتى اتقارۋشى بيلىكتىڭ، مادەنيەت باسقارمالارىنىڭ قۇزىرىندا بولۋى كەرەك. ءوز بەتىمەن حالىقتى جيىپ الىپ ەش باقىلاۋسىز كونتسەرت وتكىزۋگە جول بەرۋگە بولمايدى.
جۇزدەگەن ادام جيىلاتىن جەرلەردەگى شارالاردىڭ دۇرىس وتكىزىلۋ جاۋاپكەرشىلىگىن ۇيىمداستىرۋشىلار دا، رۇحسات بەرۋشى مەكەمە دە سەزىنەتىندەي بولسا كەشە عانا الماتىدا وتكەن كونتسەرتتىڭ ۇستىندەگى بەيادەپ تىرلىكتەر، مەملەكەتتىك تۋدى قورلاۋ فاكتىلەرىنە جول بەرىلمەس ەدى.
ءاربىر ونەر ادامى ءىس-ارەكەتىنىڭ، سويلەگەن ءسوزىنىڭ حالىقتىڭ نازارىندا بولاتىندىعىن ەسكەرۋى كەرەك. قوعامدىق سانانىڭ قالىپتاسۋىندا تانىمال ادامداردىڭ ايتقان ءانى، سومداعان ءرولى، سويلەگەن ءسوزى قوماقتى ورىن الادى.
ساحناعا شىعاتىن ءار ادام ءوزىن مەملەكەتتىك دەڭگەيدەگى يدەولوگ سەزىنۋى كەرەك.
سوندىقتان ساحناعا ايتارى بار، حالىققا بەرەرى بارلار عانا شىعۋى كەرەك!
