5 ماۋسىم كۇنى ەلىمىزدە رەفەرەندۋم وتەدى. كونستيتۋتسيانى وزگەرتۋگە باعىتتالعان رەفەرەندۋم اراعا 27 جىل سالىپ، ەكىنشى مارتە ۇيىمداستىرىلۋدا. رەفەرەندۋمعا قاتىستى قوعام ءوز ويىن بىلدىرۋدە. داۋىس بەرۋگە بارامىن دەيتىندەر مەن داۋىس بەرۋدى ءجون سانامايتىندار الەۋمەتتىك جەلىدە ءوز پىكىرىن جازىپ، قىزۋ تالقى جاساۋدا. كەز كەلگەن سايلاۋدىڭ تاعى ءبىر اجىراماس بولىگى، ول باقىلاۋشىلار ەكەنىن ءسوزسىز. باقىلاۋشىسىز وتكەن سايلاۋدى زاڭدى، ادىلەتتى ءارى شىنايى دەپ ايتۋعا بولمايدى. رەفەرەندۋمعا بايلانىستى ەل بويىنشا باقىلاۋشىلىق اتقاراتىن ۇيىمدار مەن باستاماشىل توپتاردىڭ سانى ارتۋدا.
الماتى قالاسىندا جاستاردى رەفەرەندۋمعا باقىلاۋشى بولۋعا شاقىرىپ، باستاما كوتەرگەندەردىڭ ءبىرى ساياساتتانۋشى اسحات قاسەنعالي جانە جۋرناليست نۇرگەلدى ابدىعاني. ولار ەكى اپتا بۇرىن باقىلاۋشىلار توبىن ۇيرەتۋگە دايىن ەكەنىن جانە اتالمىش رەفەرەندۋمدا "جاس باقىلاۋشى" اتاۋىمەن سايلاۋ ۋچاسكەلەرىندە رەفەرەندۋمعا مونيتورينگ جاساۋعا نيەتتى ەكەنىن جازعان ەدى. سەنبى كۇنى باستاماشىل توپ وكىلدەرى جۋرناليستەردىڭ سۇراقتارىنا جاۋاپ بەردى.
نۇرگەلدى ابدىعاني يدەيانىڭ قالاي پايدا بولعانىن جانە نەگە جاستاردى شاقىرعانى جايلى بىلاي دەيدى: "اسحاتتىڭ دا، مەنىڭ دە سايلاۋدا باقىلاۋشى بولۋ جانە باقىلاۋشىلاردى وقىتۋ جاعىنان تاجىريبەمىز بار. ءبىراز جاستاردى تانيمىز. سوندىقتان نەگە جاستاردىڭ باسىن قوسىپ، جاس باقىلاۋشىلاردى دايىنداپ كورمەسكە دەپ ايتتىم. جاستار بىزدە ساياسي تۇرعىدان بەلسەندى بولۋى كەرەك دەگەن ويدامىن. جاستاردا ەنەرگيا بار، جالىن بار، تاۋەكەلشىل كەلەدى. سوندىقتان "جاس باقىلاۋشى" دەپ اتاپ، جاستاردى شاقىردىق. جاستار كاتەگورياسىنا جاتپايتىن جاندار كەلسە دە ەسىگىمىز اشىق، بىراق باسىم بولىگى جاستار بولسا دەدىك. قازىر توقساننان استام باقىلاۋشىنى وقىتتىق. ءالى ءبىر اپتا بار، سوندىقتان ولاردىڭ سانى ارتادى دەپ ويلايمىز", - دەيدى ول.
جاستار باقىلاۋشىلىق جايلى قايدان ءبىلىپ، كەلۋدە دەگەن سۇراققا: "باسىم بولىگى الەۋمەتتىك جەلى ارقىلى ەستىپ كەلەدى. قازىر اقپاراتتى جەتكىزۋدىڭ مۇمكىندىگى مول عوي. سونىمەن قاتار جاستار اراسىندا كوپ جۇرەمىز، بەلسەندى جاستاردى تانيمىز. جالپى اقپاراتتى جەتكىزۋدىڭ قيىندىعى جوق", - دەيدى.
"باقىلاۋشىلارعا قارجى تولەنە مە" دەگەن سۇراققا اسحات قاسەنعالي بىلاي دەيدى: "شىنىن ايتقاندا قازىر ءبىزدىڭ قولىمىزدا قارجى جوق. جيىرمادان استام كاسىپكەرلەر مەن كومپانيالارعا دەمەۋشىلىك ءبىلدىرۋ بويىنشا حات جازدىق، ازىرگە جاۋاپ جوق. سوندىقتان جاستارعا دەمەۋشى تابىلسا تولەيمىز، تابىلماسا تاجىريبە مەن ەستە قالار كۇن سىيلايتىنىمىزدى ايتۋدامىز. كەي جاستار بۇل شارتقا كونبەي، كەتىپ قالادى. ونى دا جاقسى تۇسىنەمىز", - دەيدى.
باستاماشىل توپ وكىلدەرى قالا ورتالىعىنداعى ۋچاسكەلەردى بارىنشا قامتۋعا تىرىساتىنىن ايتتى. باقىلاۋشىلاردى ۇيرەتۋ الداعى اپتادا دا جالعاسىن تابادى دەيدى.
"ادىرنا" ۇلتتىق پورتالى
