"Jas Baqylaýshy" ókilderi: Jastarda energııa bar

4814
Adyrna.kz Telegram

5 maýsym kúni elimizde referendým ótedi. Konstıtýııany ózgertýge baǵyttalǵan referendým araǵa 27 jyl salyp, ekinshi márte uıymdastyrylýda. Referendýmǵa qatysty qoǵam óz oıyn bildirýde. Daýys berýge baramyn deıtinder men daýys berýdi jón sanamaıtyndar áleýmettik jelide óz pikirin jazyp, qyzý talqy jasaýda. Kez kelgen saılaýdyń taǵy bir ajyramas bóligi, ol baqylaýshylar ekenin sózsiz. Baqylaýshysyz ótken saılaýdy zańdy, ádiletti ári shynaıy dep aıtýǵa bolmaıdy. Referendýmǵa baılanysty el boıynsha baqylaýshylyq atqaratyn uıymdar men bastamashyl toptardyń sany artýda. 

Almaty qalasynda jastardy referendýmǵa baqylaýshy bolýǵa shaqyryp, bastama kótergenderdiń biri saıasattanýshy Ashat Qasenǵalı jáne jýrnalıst Nurgeldi Ábdiǵanı. Olar eki apta buryn baqylaýshylar tobyn úıretýge daıyn ekenin jáne atalmysh referendýmda "Jas Baqylaýshy" ataýymen saılaý ýchaskelerinde referendýmǵa monıtorıng jasaýǵa nıetti ekenin jazǵan edi. Senbi kúni bastamashyl top ókilderi jýrnalısterdiń suraqtaryna jaýap berdi.

Nurgeldi Ábdiǵanı ıdeıanyń qalaı paıda bolǵanyn jáne nege jastardy shaqyrǵany jaıly bylaı deıdi: "Ashattyń da, meniń de saılaýda baqylaýshy bolý jáne baqylaýshylardy oqytý jaǵynan tájirıbemiz bar. Biraz jastardy tanımyz. Sondyqtan nege jastardyń basyn qosyp, jas baqylaýshylardy daıyndap kórmeske dep aıttym. Jastar bizde saıası turǵydan belsendi bolýy kerek degen oıdamyn. Jastarda energııa bar, jalyn bar, táýekelshil keledi. Sondyqtan "Jas Baqylaýshy" dep atap, jastardy shaqyrdyq. Jastar kategorııasyna jatpaıtyn jandar kelse de esigimiz ashyq, biraq basym bóligi jastar bolsa dedik. qazir toqsannan astam baqylaýshyny oqyttyq. Áli bir apta bar, sondyqtan olardyń sany artady dep oılaımyz", - deıdi ol.

Jastar baqylaýshylyq jaıly qaıdan bilip, kelýde degen suraqqa: "Basym bóligi áleýmettik jeli arqyly estip keledi. Qazir aqparatty jetkizýdiń múmkindigi mol ǵoı. Sonymen qatar jastar arasynda kóp júremiz, belsendi jastardy tanımyz. Jalpy aqparatty jetkizýdiń qıyndyǵy joq", - deıdi.

"Baqylaýshylarǵa qarjy tólene me" degen suraqqa Ashat Qasenǵalı bylaı deıdi: "Shynyn aıtqanda qazir bizdiń qolymyzda qarjy joq. Jıyrmadan astam kásipkerler men kompanııalarǵa demeýshilik bildirý boıynsha hat jazdyq, ázirge jaýap joq. Sondyqtan jastarǵa demeýshi tabylsa tóleımiz, tabylmasa tájirıbe men este qalar kún syılaıtynymyzdy aıtýdamyz. Keı jastar bul shartqa kónbeı, ketip qalady. Ony da jaqsy túsinemiz", - deıdi.

Bastamashyl top ókilderi qala ortalyǵyndaǵy ýchaskelerdi barynsha qamtýǵa tyrysatynyn aıtty. Baqylaýshylardy úıretý aldaǵy aptada da jalǵasyn tabady deıdi.

"Adyrna" ulttyq portaly

Pikirler