26 مامىر كۇنى تۇركىستان قالاسىندا كەرۋەن ساراي ورتالىعىندا «NEET جاستارىنىڭ قۇندىلىعى» تاقىرىبىندا كەزدەسۋ ءوتتى.
كەزدەسۋ «جاستاردى الەۋمەتتەندىرۋ جانە وڭالتۋ» جوباسى اياسىندا جالعاسىن تاپتى.
جوبا جاستاردىڭ جۇمىس جانە وقۋعا كەلگەندە بەلسەندىلىك تانىتپاۋ سەبەپتەرى، جوبالىق كەڭسە تاراپىنان جاستارعا كومەك بەرۋ جانە كاسىبي باعدارلاۋ تۇرلەرى، NEET جاستارىنىڭ قوردالانعان ماسەلەلەرىنىڭ شەشۋ جولدارىن قاراستىرۋعا باعىتتالعان.
جاستاردى بولاشاق ومىرلىك جوسپارلارىنا ىنتالاندىرۋ جانە شىعارماشىلىق الەۋەتتى دامىتۋ ماقساتىندا ءومىرىن ونەرمەن ورنەكتەگەن قر مادەنيەت قايراتكەرى، «دارىن» سىيلىعىنىڭ يەگەرى ايتىسكەر، اقىن بەكارىس شويبەكوۆ جاستارعا مانساپ جانە جەكە ءوسۋ ءۇشىن ومىرلىك داعدىلاردى دامىتۋداعى تاجىريبەلەرى مەن جىبەرگەن قاتەلىكتەرى جونىندە ايتىپ بەردى. سونىمەن قاتار، جۇمىسپەن قامتۋ ورتالىعىنىڭ ديرەكتورىنىڭ ورىنباسارى قابىلبەك اسىلبەك،
«بيزنەستى قولداۋ جانە تۋريزم ءبولىمى» باسشىسى قىدىرباەۆ تالعات تا شاراعا قاتىستى.
«اقىندىق دەگەن وڭاي نارسە ەمەس. سيكرەتتى ونەر دەيدى عوي، ول دەگەنىڭىز سان سالالى، قۇپياسى تەرەڭ ونەر عوي. تاباناستى بىرەۋگە قاراسوزبەن ءۋاج ايتۋدىڭ ءوزى وڭاي ەمەس. بىراق ول جەردە ولەڭمەنەن، قولما-قول جانە ۇتىمدى، شەبەر، كوركەم جاۋاپ بەرۋ كەرەك. ول قيىننىڭ-قيىنى. بىراق، قيىن ەكەن دەپ ورتا جولدان تاستاپ كەتپەيسىڭ عوي. سول سەكىلدى كەز-كەلگەن ءىستى باستادىڭ با سوڭىنا دەيىن اپار. كوزىڭ قورقىپ، وزىڭە سەنبەي تۇرۋىڭ مۇمكىن، بىراق جەڭىسكە دەگەن تالپىنىس ۇشقىنى بولسا سەن ەشتەڭەدەن قورىقپايسىڭ. سوندىقتان تالپىنۋ كەرەك، ىزدەنۋ كەرەك، مويىماۋ كەرەك»،- دەيدى بەكارىس اقىن.
كەزدەسۋ بارىسىندا بۇگىنگى كۇنى ەڭبەك نارىعىنداعى قاجەتتى ماماندىقتار جانە قاي سالانى بەلسەندى دامىتۋ كەرەك، جاستاردى كاسىپكەرلىك قىزمەتكە وقىتۋ، كاسىپكەردىڭ قاجەتتى داعدىلارى، جاستارعا بەرىلگەن مۇمكىندىك پەن سونى قالاي دۇرىس پايدالانۋ كەرەكتىگى جايىندا ءسوز بولادى.
