26 mamyr kúni Túrkistan qalasynda Kerýen saraı ortalyǵynda «NEET jastarynyń qundylyǵy» taqyrybynda kezdesý ótti.
Kezdesý «Jastardy áleýmettendirý jáne ońaltý» jobasy aıasynda jalǵasyn tapty.
Joba jastardyń jumys jáne oqýǵa kelgende belsendilik tanytpaý sebepteri, jobalyq keńse tarapynan jastarǵa kómek berý jáne kásibı baǵdarlaý túrleri, NEET jastarynyń qordalanǵan máseleleriniń sheshý joldaryn qarastyrýǵa baǵyttalǵan.
Jastardy bolashaq ómirlik josparlaryna yntalandyrý jáne shyǵarmashylyq áleýetti damytý maqsatynda ómirin ónermen órnektegen QR mádenıet qaıratkeri, «Daryn» syılyǵynyń ıegeri aıtysker, aqyn Bekarys Shoıbekov jastarǵa mansap jáne jeke ósý úshin ómirlik daǵdylardy damytýdaǵy tájirıbeleri men jibergen qatelikteri jóninde aıtyp berdi. Sonymen qatar, Jumyspen qamtý ortalyǵynyń dırektorynyń orynbasary Qabylbek Asylbek,
«Bıznesti qoldaý jáne týrızm bólimi» basshysy Qydyrbaev Talǵat ta sharaǵa qatysty.
«Aqyndyq degen ońaı nárse emes. Sıkretti óner deıdi ǵoı, ol degenińiz san salaly, qupııasy tereń óner ǵoı. Tabanasty bireýge qarasózben ýáj aıtýdyń ózi ońaı emes. Biraq ol jerde óleńmenen, qolma-qol jáne utymdy, sheber, kórkem jaýap berý kerek. Ol qıynnyń-qıyny. Biraq, qıyn eken dep orta joldan tastap ketpeısiń ǵoı. Sol sekildi kez-kelgen isti bastadyń ba sońyna deıin apar. Kóziń qorqyp, ózińe senbeı turýyń múmkin, biraq jeńiske degen talpynys ushqyny bolsa sen eshteńeden qoryqpaısyń. Sondyqtan talpyný kerek, izdený kerek, moıymaý kerek»,- deıdi Bekarys aqyn.
Kezdesý barysynda búgingi kúni eńbek naryǵyndaǵy qajetti mamandyqtar jáne qaı salany belsendi damytý kerek, jastardy kásipkerlik qyzmetke oqytý, kásipkerdiń qajetti daǵdylary, jastarǵa berilgen múmkindik pen sony qalaı durys paıdalaný kerektigi jaıynda sóz bolady.
