رەسەي قارجى ءمينيسترى انتون سيلۋانوۆ قارجى ۋنيۆەرسيتەتى ستۋدەنتتەرىنىڭ الدىندا سويلەگەن كەزدە دوللار مەن ەۋرونى "ۋىتتى فانتيكتەر" دەپ اتادى، دەپ حابارلايدى"ادىرنا" ۇلتتىق پورتالى "azattyq.org" سايتىنا سىلتەمە جاساپ.
"ۆاليۋتانىڭ نە كەرەگى بار؟ ياعني، ءبىز ءوز بايلىعىمىز - گازدى ساتىپ، ورنىنا فانتيكتەر، ۋىتتى فانتيكتەر الىپ جاتىرمىز. ولاردىڭ نە قاجەتى بار؟"- دەدى مينيستر.
لەكتسيا بارىسىندا ول ستۋدەنتتەرگە ۋكرايناداعى "ارنايى وپەراتسيا" (رەسەي بيلىگى ۋكرايناعا باسقىنشىلىعىن سوعىس دەپ اتاۋعا تىيىم سالعان) "كوپ رەسۋرستى" تالاپ ەتەدى دەپ ايتقان، بىراق ناقتى كورسەتكىش كەلتىرمەگەن.
ونىڭ ايتۋىنشا، ەكونوميكانى قولداۋ ءۇشىن بيىل 8 ترلن رۋبل بولىنگەن (سالىستىرۋ ءۇشىن: مىسالى، 2022 جىلى رەسەي زەينەتاقىنى تولەۋگە 600 ملرد رۋبل جۇمسايدى).
ناۋرىز ايىنىڭ سوڭىندا رەسەي پرەزيدەنتى ۆلاديمير پۋتين رەسەي گازىن ەۋروپا ەلدەرىنە رۋبلمەن ساتۋدى تاپسىرعان. ول ءۇشىن ولار رەسەي بانكتەرىنەن ەسەپشوت اشۋى ءتيىس. ناتيجەسىندە تولەم ءبارىبىر ەۋرودا جۇرگىزىلەدى. بانك ىشكى نارىقتان رۋبل ساتىپ الىپ، ونى گاز ساتۋشىنىڭ رۋبلدىك ەسەپشوتىنا اۋدارادى.
"ادىرنا" ۇلتتىق پورتالى.
