باۋىرجان مومىشۇلى اتىنداعى ورتا مەكتەپتىڭ تۇلەكتەرى سوڭعى قوڭىراۋدا "ناشي روسسيسكيە گەروي" دەيتىن ءماتىنى بار انگە بي بيلەگەن. بۇل تۋرالى قالالىق ءبىلىم ءبولىمىنىڭ Instagram-پاراقشاسىندا جاريالادى، دەپ حابارلايدى «ادىرنا» ۇلتتىق پورتالى.
ب.مومىشۇلى اتىنداعى ورىس تىلىندە ءبىلىم بەرەتىن ورتا مەكتەپتىڭ سوڭعى قوڭىراۋ سالتاناتىنا قالا اكىمى مارات جۇندىباەۆ قاتىسقان.
بەينەجازبادان اسكەري كيىم كيگەن تۇلەكتەر رەسەيدىڭ پاتريوتتىق انىنە بيلەگەنىن كورۋگە بولادى. بۇل جونىندە قالالىق ءبىلىم ءبولىمىنىڭ جەتەكشىسى گۇلسىم ورازباەۆا تۇسىنىك بەردى.
"بۇل وسى مەكتەپتە كوپ جىلدار بويى وينالىپ كەلگەن تاريحي ۆالس ەكەن. بيىل 20 جىلدىعىنا وراي سول داستۇرمەن تاعى دا قوسىلدى. سوزىنە اسا ءمان بەرۋدىڭ، بوتەن استار ىزدەۋدىڭ قاجەتى جوق سياقتى. وعان ءمان بەرىپ جاتقان ەشكىم جوق. باستىسى، ءىس-شارا جوعارى دەڭگەيدە ءوتتى. اتا-انالار كوزدەرىنە جاس الدى. ۆيدەو استىنا دا تەك جاقسى پىكىرلەر جازىلىپ جاتىر", — دەيدى ول.
گۇلسىم ورازباەۆانىڭ ايتۋىنشا، ارنايى تاپسىرىسپەن مەكتەپتىڭ جاڭا ءانۇرانى جازىلىپ جاتىر. سىنعا ىلىككەن ۆيدەو پاراقشادان ءوشىرىلىپ تاستالىنعان.
«ادىرنا» ۇلتتىق پورتالى
