قىرعىزستاننىڭ ىستىقكول وبلىسى، جەتى-وگۇز اۋدانى، قىزىل-سۋ اۋىلىندا لەنيننىڭ ءبيۋستى سالتاناتتى تۇردە اشىلدى، دەپ حابارلايدى "ادىرنا" ۇلتتىق پورتالى "Sputnik قازاقستانعا" سىلتەمە جاساپ.
بيۋست ۆ.ي.لەنين اتىنداعى مەكتەپ عيماراتىنىڭ جانىنا ورناتىلعان. شارا پيونەرلەردىڭ 100 جىلدىعىنا ورايلاستىرىلىپتى.
"باستامانى ۇستازدار قاۋىمى كوتەردى. مۇعالىمدەر: "لەنين اتىنداعى مەكتەپتىڭ جانىندا نەگە لەنيننىڭ ءبيۋستى جوق؟"-دەدى. ەسكى اۆتوبازانىڭ جانىندا قۇلاي باستاعان لەنيننىڭ ءبيۋستى بار ەكەنىن ءبارى بىلەتىن. مۇعالىمدەر ارقايسىسى 500 سومنان جيناپ، سول اقشاعا ءبيۋستتى قالپىنا كەلتىرىپ، ىرگەتاسىن دايىندادى. بۇگىن پيونەرلەردىڭ مەرەيتويىنا وراي ءبيۋستتىڭ اشىلۋى جانە سىنىپ ساعاتتارى ءوتتى", - دەدى سەلولىق وكرۋگ اكىمى تۇرار اساناليەۆ.
ول ءبيۋستتى قالپىنا كەلتىرۋگە شامامەن 6000 سوم جۇمسالعانىن ايتتى.
ايتا كەتۋ كەرەك، 1922 جىلى 19 مامىردا ۆ.ي.لەنين اتىنداعى بۇكىلوداقتىق پيونەر ۇيىمى قۇرىلدى.
"ادىرنا" ۇلتتىق پورتالى.
