بۇگىن پارلامەنت ءماجىلىسىنىڭ دەپۋتاتى ساياسات نۇربەك ەۋروپاداعى قاۋىپسىزدىك جانە ىنتىماقتاستىق جونىندەگى ۇيىمنىڭ دەموكراتيالىق ينستيتۋتتار جانە ادام قۇقىقتارى بيۋروسى دەلەگاتسياسىمەن كەزدەسىپ، رەفەرەندۋم كەزىندە بىرلەسە جۇمىس اتقارۋعا كەلىستى، دەپ حابارلايدى "ادىرنا" ۇلتتىق پورتالى.
بۇل تۋرالى دەپۋتات ءوز فەيسبۋك پاراقشاسىندا جازدى.
"رەسپۋبليكامىزداعى سايلاۋ كەزەڭىندەگى دەموكراتيالىق ينستيتۋتتار جانە ادام قۇقىقتارى بيۋروسىنىڭ ءداستۇرلى باقىلاۋىنىڭ ءبىز ءۇشىن ماڭىزى زور. سوڭعى جىلدارى بىرلەسكەن جۇمىسىمىزدىڭ ارقاسىندا سەرىكتەستىگىمىز نىعايا تۇسكەنىن اتاپ وتكىم كەلەدى.
6 مامىر كۇنى ءسىم ءتۇرلى حالىقارالىق ۇيىمدارمەن قاتار ەۋروپاداعى قاۋىپسىزدىك جانە ىنتىماقتاستىق جونىندەگى ۇيىمىنا دا الداعى رەفەرەندۋمنىڭ ءوتۋىن باقىلاۋ ءۇشىن شاقىرتۋ جىبەرگەن بولاتىن. كەزدەسۋ بارىسىندا ءبىز ازاماتتارىمىزدىڭ سايلاۋ قۇقىعى ساقتالۋى ءۇشىن اشىقتىق ساياساتىن ۇستاناتىنىمىز جايلى ءسوز بولدى. وسى ورايدا سايلاۋ ناۋقاندارىن جوعارى دەموكراتيالىق ستاندارتتارعا ساي وتكىزۋىمىزگە ىقپالداستىق تانىتىپ، باقىلاۋعا كومەك كورسەتىپ جۇرگەن بىرنەشە جىلدىق ەقىۇ سەرىكتەستىگىمىزگە اسا زور ماڭىز بەرەتىنىمىز ايتىلدى.
وسك الداعى رەفەرەندۋمدى حالىقارالىق ۇيىمدار مەن ەۋروپاداعى قاۋىپسىزدىك جانە ىنتىماقتاستىق جونىندەگى ۇيىمنىڭ ۇسىنىستارىن ەسكەرە وتىرىپ، جوعارعى دەڭگەيدە وتكىزىپ شىعاتىنىنا سەنىمىز مول", — دەپ جازدى ول.
ساياسات نۇربەك — دەپۋتات عانا ەمەس، ءوز پىكىرىن اشىق بىلدىرەتىن، ساۋاتتى پوليتولوگ، ۇلتجاندى ازامات. وسىنداي ساياساتكەرلەر جاڭا قازاقستاننىڭ وركەندەپ، دامۋىنا اتسالىسسا، الەم ءبىزدىڭ ەلىمىزدى بۇدان دا ارتىق قۇرمەتتەپ، تانيتىن بولادى.
ناتيجەسىندە ءتۇرلى حالىقارالىق ۇيىمدار قازاقستانمەن سەرىكتەس بولىپ، ىنتىماقتاستىق قاتىناستار نىعايادى.
"ادىرنا" ۇلتتىق پورتالى
