مۇحتار جاكىشەۆ: "بيلىككە بارعىم كەلمەيدى جانە ماعان بيلىكتەن ەشتەڭە كەرەك ەمەس"

3305
Adyrna.kz Telegram
فوتو: اشىق دەرەككوزدەن
فوتو: اشىق دەرەككوزدەن

قازاقستاندىق بيزنەسمەن جانە "قازاتومپروم" كومپانياسىنىڭ بۇرىنعى باسشىسى مۇحتار جاكىشەۆ "Forbes Kazakhstan" يۋتۋب-كانالىنا بەرگەن سۇحباتىندا بيلىككە بارعىسى كەلمەيتىنىن، ەندى كوپ ۋاقىتىن وتباسىنا جانە ءوز كاسىبىنە ارنايتىنىن ايتتى، دەپ حابارلايدى "ادىرنا" ۇلتتىق پورتالى.

"قازاقستان حالقى ءسىزدى ساياساتتا كورگىسى كەلەدى. ءسىز بۇل تۋرالى نە ويلايسىز؟" دەگەن ءجۋرناليستىڭ ساۋالىنا بيزنەسمەن بىلاي دەپ جاۋاپ بەردى:

– مەن ەشقاشان ساياساتتا بولعان ەمەسپىن، ارقاشان مەنەدجەر بولدىم. مەن ءۇشىن بيلىك بۇل مۇمكىندىك ەمەس، كەيبىرەۋلەرگە سياقتى، ەڭ الدىمەن، جاۋاپكەرشىلىك. بۇل سالادا جۇمىس ۋاقىتى كوپ، بوس ۋاقىت از بولادى. مەن وزىمە جانە وتباسىما از ۋاقىت بولەمىن. مەن وتباسىمدى كوپ كورمەدىم: تۇرمەدە وتىرعاندا قۇندىلىقتارىڭ وزگەرەدى. تۇتقىنداۋعا دەيىن ءىرى كومپانيالاردىڭ پرەزيدەنتتەرىمەن، ءارتۇرلى ەلدەردىڭ پرەزيدەنتتەرىمەن كەزدەسۋلەر قۇندى دەپ سانالدى. بىراق ءسىز تۇرمەدە بولعان كەزدە مۇنىڭ ەشقايسىسى ماڭىزدى ەمەس ەكەنىن تۇسىنە باستايسىز، — دەدى ول.

جاكىشەۆ تۇرمەگە تۇسكەندە ۇلى 9 جاستا بولىپتى، ودان كەيىن ول ۇلى 20-عا تولعاندا عانا قاۋىشقان.

— مەن تۇرمەدەن شىققاندا، ونىڭ مەن تۋرالى ەستەلىكتەرىندە تەك ءبىزدىڭ بىرگە بالىق اۋلاۋعا بارعانىمىز عانا بولدى. بالالار اكەسىز ءوستى، ولاردا ورتاق ەشتەڭە بولمادى، ويتكەنى مەن جوقپىن. سوندا پرەزيدەنتتەرمەن وسىنشا كەزدەسۋلەر، كەلىسىم-شارتتار - كىمگە كەرەك؟! جۇرت ماعان ەلگە كەرەك ەكەنىمدى ايتتى، بىراق اقىرى مەنى تۇرمەگە تىقتى عوي. سونى ويلاسام، قازىر بۇرىن ماڭىزدى دەپ ويلاعان نارسەم مۇلدەم ماڭىزدى ەمەس بولىپ شىقتى. بۇل 11 جىل تۇرمەدە وتىرىپ جاساعان تۇجىرىمىم. بالكىم، بيلىك كەيبىرەۋلەر ءۇشىن ەسىرتكى شىعار. بىراق مەن ءۇشىن بۇل ۇلكەن جاۋاپكەرشىلىك، — دەدى م. جاكىشەۆ.

بيزنەسمەن ەندى بيلىككە ورالعىسى كەلمەيتىنىن ايتتى. حالىقتىڭ ءسوزى ءۇشىن ەندى التىن ۋاقىتى مەن ءومىرىن قۇر وتكىزگىسى كەلمەيدى.

— بۇل بيلىك نە ءۇشىن كەرەك؟ مەن بيلىككە بارعىم كەلمەيدى. نەگىزى ماعان بيلىكتەن ەشتەڭە كەرەك ەمەس. ماعان تەك ەركىندىك كەرەك، مەن تاققا قىزىقپايمىن. جەكە كاسىبىم بار، سونىمەن اينالىسامىن، — دەدى ول.

"ادىرنا" ۇلتتىق پورتالى.

 

پىكىرلەر