2021 جىلدىڭ قورىتىندىسى بويىنشا ەلىمىزدە سۋمەن جابدىقتاۋ قىزمەتتەرىنە قولجەتىمدىلىك 96%-دى قۇرادى. بۇل تۋرالى ۇكىمەت وتىرىسىندا يندۋستريا جانە ينفراقۇرىلىمدىق دامۋ مينيسترلىگىنىڭ باسشىسى قايىربەك وسكەنباەۆ ءمالىم ەتتى.
يدم باسشىسىنىڭ اقپاراتى بويىنشا اۋىلدىق جەرلەردە سۋمەن جابدىقتاۋ كورسەتكىشتەرى بويىنشا الماتى (99,1%), اتىراۋ (99%), قىزىلوردا (97,8%) جانە ماڭعىستاۋ وبلىستارى (96,2%) اكىمدىكتەرى كوش باسىندا. اۋىلدىق ەلدى-مەكەندەردە اۋىز سۋمەن قامتۋدىڭ ەڭ تومەنگى دەڭگەيى قوستاناي (74,9%) جانە سولتۇستىك قازاقستان وبلىستارىندا (83,5%) بايقالادى.
ايتا كەتەرلىگى، كورسەتكىشتەرى تومەن وڭىرلەرگە سۋمەن قامتاماسىز ەتۋ دەڭگەيىن ارتتىرۋ ءۇشىن باسىم نەگىزدە قاراجات بولىنەدى. ماسەلەن، 2022 جىلى وسى ماقساتتا رەسپۋبليكالىق بيۋدجەتتەن 215 ملرد تەڭگە كوزدەلگەن. سونداي-اق، تاعى 120 اۋىلدى ورتالىقتاندىرىلعان سۋ جۇيەسىمەن قامتاماسىز ەتىپ، حالىق سانى از 220 اۋىلعا كەشەندى بلوك-مودۋلدەر ورناتۋ جوسپارلانۋدا.
ەستەرىڭىزگە سالا كەتەيىك، قر يدم اۋىلداردى سۋمەن قامتاماسىز ەتۋ بارىسىنا مونيتورينگ جاساۋ ءۇشىن ينتەراكتيۆتى كارتا ازىرلەگەن بولاتىن. اتالعان كارتا عالامتوردا قولجەتىمدى.
"كارتادا سۋمەن جابدىقتاۋ قىزمەتتەرىمەن قامتاماسىز ەتۋ، قارجىلاندىرۋ كولەمى، حالىق سانى، توزۋ دەڭگەيى جانە باسقا دا وزەكتى اقپارات كورسەتىلگەن. حالىقتى ساپالى اۋىز سۋمەن قامتاماسىز ەتۋ ماسەلەسى ءبىزدىڭ تۇراقتى باقىلاۋىمىزدا ەكەنىن ەسكەرە وتىرىپ، جەرگىلىكتى اتقارۋشى ورگاندار ينتەراكتيۆتى كارتانى ساپالى جانە ۋاقتىلى تولتىرۋى قاجەت", – دەپ اتاپ ءوتتى قايىربەك وسكەنباەۆ.
حالىقپەن كەرى بايلانىس ورناتۋ ماقساتىندا ازاماتتاردىڭ بارلىق ءوتىنىشىن قابىلداۋ مەن وڭدەۋگە ارنالعان بىرىڭعاي پلاتفورما ارقىلى كارتاعا قوسىمشا فۋنكتسيالاردى قوسۋ بويىنشا شارالار قابىلدانعان.
سونداي-اق، ۆەدومستۆو باسشىسى سالىنعان سۋ قۇبىرى جەلىلەرى ءىس جۇزىندە اكىمدىكتەردىڭ تەڭگەرىمىندە قالىپ نە بولماسا بىلىكتى ماماندارى مەن ارنايى مامانداندىرىلعان تەحنيكاسى جوق كاسىپورىندار مەن ۇيىمدارعا بەرىلىپ جاتاتىنىنا باسا نازار اۋداردى.
"سۋمەن جابدىقتاۋ جەلىلەرىنە اكىمدىكتەرمەن قاتار بۇل جۇمىسقا بەيىندەلمەگەن كاسىپورىندار قىزمەت كورسەتەدى. بۇل ءوز كەزەگىندە جەلىلەردىڭ تەز ارادا توزۋىنا اكەپ سوعادى جانە قايتا قالپىنا كەلتىرۋ ءۇشىن قوسىمشا شىعىندى تالاپ ەتەدى. وسىعان بايلانىستى «ءبىر اۋدان – ءبىر كاسىپورىن» قاعيداتى بويىنشا سۋ ارنالارىن ىرىلەندىرۋ ۇسىنىلادى. بۇل شارا كورسەتىلەتىن قىزمەت ساپاسىن جانە جۇمىس تيىمدىلىگىن ارتتىرۋعا مۇمكىندىك بەرەدى", – دەدى مينيستر.
«ادىرنا» ۇلتتىق پورتالى
