2021 jyldyŋ qorytyndysy boiynşa elımızde sumen jabdyqtau qyzmetterıne qoljetımdılık 96%-dy qūrady. Būl turaly Ükımet otyrysynda İndustriia jäne infraqūrylymdyq damu ministrlıgınıŋ basşysy Qaiyrbek Öskenbaev mälım ettı.
İİDM basşysynyŋ aqparaty boiynşa auyldyq jerlerde sumen jabdyqtau körsetkışterı boiynşa Almaty (99,1%), Atyrau (99%), Qyzylorda (97,8%) jäne Maŋǧystau oblystary (96,2%) äkımdıkterı köş basynda. Auyldyq eldı-mekenderde auyz sumen qamtudyŋ eŋ tömengı deŋgeiı Qostanai (74,9%) jäne Soltüstık Qazaqstan oblystarynda (83,5%) baiqalady.
Aita keterlıgı, körsetkışterı tömen öŋırlerge sumen qamtamasyz etu deŋgeiın arttyru üşın basym negızde qarajat bölınedı. Mäselen, 2022 jyly osy maqsatta respublikalyq biudjetten 215 mlrd teŋge közdelgen. Sondai-aq, taǧy 120 auyldy ortalyqtandyrylǧan su jüiesımen qamtamasyz etıp, halyq sany az 220 auylǧa keşendı blok-modulder ornatu josparlanuda.
Esterıŋızge sala keteiık, QR İİDM auyldardy sumen qamtamasyz etu barysyna monitoring jasau üşın İnteraktivtı karta äzırlegen bolatyn. Atalǧan karta ǧalamtorda qoljetımdı.
"Kartada sumen jabdyqtau qyzmetterımen qamtamasyz etu, qarjylandyru kölemı, halyq sany, tozu deŋgeiı jäne basqa da özektı aqparat körsetılgen. Halyqty sapaly auyz sumen qamtamasyz etu mäselesı bızdıŋ tūraqty baqylauymyzda ekenın eskere otyryp, jergılıktı atqaruşy organdar interaktivtı kartany sapaly jäne uaqtyly toltyruy qajet", – dep atap öttı Qaiyrbek Öskenbaev.Halyqpen kerı bailanys ornatu maqsatynda azamattardyŋ barlyq ötınışın qabyldau men öŋdeuge arnalǧan bıryŋǧai platforma arqyly kartaǧa qosymşa funksiialardy qosu boiynşa şaralar qabyldanǧan. Sondai-aq, vedomstvo basşysy salynǧan su qūbyry jelılerı ıs jüzınde äkımdıkterdıŋ teŋgerımınde qalyp ne bolmasa bılıktı mamandary men arnaiy mamandandyrylǧan tehnikasy joq käsıporyndar men ūiymdarǧa berılıp jatatynyna basa nazar audardy.
"Sumen jabdyqtau jelılerıne äkımdıktermen qatar būl jūmysqa beiındelmegen käsıporyndar qyzmet körsetedı. Būl öz kezegınde jelılerdıŋ tez arada tozuyna äkep soǧady jäne qaita qalpyna keltıru üşın qosymşa şyǧyndy talap etedı. Osyǧan bailanysty «bır audan – bır käsıporyn» qaǧidaty boiynşa su arnalaryn ırılendıru ūsynylady. Būl şara körsetıletın qyzmet sapasyn jäne jūmys tiımdılıgın arttyruǧa mümkındık beredı", – dedı ministr.
«Adyrna» ūlttyq portaly
