مەملەكەت باسشىسى قاسىم-جومارت توقاەۆ قاپشاعاي اتاۋىن قوناەۆ دەپ وزگەرتۋ تۋرالى جارلىققا قول قويدى، - دەپ حابارلايدى "ادىرنا" ءتىلشىسى اقوردانىڭ ءباسپاسوز قىزمەتىنە سىلتەمە جاساپ.
«مەملەكەت باسشىسى «الماتى وبلىسىنداعى قاپشاعاي قالاسىن قوناەۆ قالاسى دەپ اتاۋ تۋرالى» جارلىققا قول قويدى»، - دەلىنگەن حابارلامادا.
جارلىق العاشقى رەسمي جاريالانعان كۇنىنەن باستاپ قولدانىسقا ەنگىزىلەدى.
ناۋرىز ايىنىڭ ورتاسىندا مەملەكەت باسشىسى حالىققا جولداۋىندا، ەگەر حالىق وسىنداي باستاما كوتەرسە، قاپشاعاي قالاسىنىڭ اتىن قوناەۆ دەپ وزگەرتۋ تۋرالى ۇسىنىسقا قوسىلۋعا دايىن ەكەنىن مالىمدەدى.
«قاپشاعاي قالاسى حالقىمىزدىڭ كورنەكتى قايراتكەرى دىنمۇحامەد قوناەۆتىڭ ەسىمىمەن تىعىز بايلانىستى. ەگەر حالىق قاپشاعايدىڭ اتىن ونىڭ قۇرمەتىنە وزگەرتۋدى ۇسىنسا، مەن دە بۇل پىكىرگە قوسىلامىن»، - دەدى ول.
كەيىن قالا اتاۋىن وزگەرتۋ تۋرالى ۇسىنىستى ءماسليحات دەپۋتاتتارى قولداپ، جەرگىلىكتى تۇرعىندار دا ءوز پىكىرلەرىن ءبىلدىردى.
"ادىرنا" ۇلتتىق پورتالى
