مەملەكەت باسشىسى قاسىم-جومارت توقاەۆ قازاقستان حالقىن ورازا ايت مەرەكەسىمەن قۇتتىقتادى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەمە جاساپ.
"قۇرمەتتى وتانداستار!
سىزدەردى بارشا مۇسىلمان قاۋىمى ءۇشىن قاسيەتتى ورازا ايت مەيرامىمەن شىن جۇرەكتەن قۇتتىقتايمىن!
وتىز كۇندىك ورازادان كەيىن كەلەتىن بۇل مەرەكەنى حالقىمىز قاشاندا ەرەكشە سەزىممەن، زور قۋانىشپەن قارسى الادى. رۋحاني تازارۋعا جانە كەمەلدەنۋگە باستايتىن رامازان ايىن ۇلىقتاپ، ءبىر-بىرىنە ىزگى تىلەكتەرىن ارنايدى.
ورازا ايت ءار مۇسىلماننىڭ جۇرەگىنە يماندىلىق نۇرىن سەبەدى. جۇرتتى جاقسىلىق جاساۋعا، قاناعاتشىل، قايىرىمدى جانە كەشىرىمدى بولۋعا ۇندەيدى. ءبىز حالقىمىزدىڭ وسىنداي بىرەگەي قاسيەتتەرىنىڭ ارقاسىندا بىرلىگىمىزدى بەكەمدەپ كەلەمىز.
يسلامنىڭ اسىل قۇندىلىقتارى جاڭا قازاقستاننىڭ دا رۋحانياتىن وركەندەتۋگە سەپتىگىن تيگىزەرى ءسوزسىز.
ايت قابىل بولسىن! بارشاڭىزعا مىقتى دەنساۋلىق، باق-بەرەكە تىلەيمىن! ايتتان ايتقا امان-ەسەن جەتە بەرەيىك! ەلىمىز امان، جۇرتىمىز تىنىش بولسىن!" - دەلىنگەن قۇتتىقتاۋدا.
"ادىرنا" ۇلتتىق پورتالى
