Nur-Sultan qalasyndaǵy №93-mektebiniń bir top ata-anasy mektepten orys tilinde oqytatyn aralas synyp ashýǵa qatysty másele kóterdi, dep habarlaıdy "Adyrna" saıty. Atalǵan máselege baılanysty mektep basshylyǵy ashyq jıyn ótkizgen.
Jıynǵa Májilis depýtaty Qazybek Isa, Janarbek Áshimjan, Amanjol Áltaı, Maqpal Mysa jáne aqyn Dáýletkereı Kápuly, Qazaq til qoǵamynyń múshesi Serik Erǵalı, Hımııa ǵylymdary boıynsha PhD doktorant, Nur-Sultan qalasynda №90 mektep-gımnazııanyń dırektory Aıatjan Ahmetjanuly da qatysqan.
Jıyn barysynda eki jaq biraz bir toqtamǵa kele almaǵanymen nátıjesinde mámilege keldi. Alaıda jıyn sońynda bir ata-ana jıyndy tolyq vıdoeǵa túsirip alǵanyn jáne ony Reseı prezıdenti Pýtınge joldaıtynyn aıtyp qorqytqan.
Bul týraly Aıatjan Ahmetjanuly óziniń Facebook paraqshasynda bylaı dep jazdy:
«Búgin bir mektepti qazaq etip saqtap qalý úshin jınalys boldy. Májilis depýtattary qatysty.Bundaıǵa ysyldyq qoı, zańdyq turǵyda biraz ata-analardy ornyna qoıdyq. Til janashyrlary biraz lekııa oqydy. Qyrǵyn daý boldy. Álim kelgenshe bala quqyǵy buzylmaıtynyn zań boıynsha túsindirip, basqa mektepke baratynyn aıttym. Bul mektep taza qazaq bop qalady dep kesimdi sóz aıttym. (Bir resmı men sheshetindeı). Eń ókinishtisi orys synybyn talap etip otyrǵan kileń qazaq. Sol qazaqtyń biri jınalystan shyqqasyn esik aldynda turyp, búgingi sóılegen sózderdiń bárin túsirip aldym. Tolyq vıdeo jasadym. Reseıge, Pýtınge tike jiberem deıdi. (qazaq áıel). Depýtattarymyzdyń kózin baqyraıtyp qoıyp, Pýtınmen qorqytty. Baratyn jerińe bar dedim kúıip ketip... Ne deıin...».
«Masqara! Men ony aıtqan kezde muǵalimder bólmesinde jurtpen sóılesip turǵan edim, keıin esittim. Sumdyq qoı! Qul ǵoı naǵyz, qojaıynyn Pýtın sanaǵan! Mine, bizdiń bıliktiń 30 jylda bir ultty eki tilge - ekige bólgen qastandyǵy!» deıdi Májilis depýtaty Qazybek Isa.
Bul másele qoǵamda qyzý talqynyń astynda qaldy. Osyǵan baılanysty belsendiler túrli pikir bildirýde. Qazaq tili qoǵamynyń múshesi Serik Erǵalı bylaı dep jazdy:
– Til máselesi maıdanǵa aınalyp barady... Jasyratyny joq. Búgin ǵana astanalyq jańa ashylǵaly otyrǵan 93-mekteptiń taǵdyry kókparǵa tústi. Onshaqty qazaq kelinshegi kelip, ózderiniń quqyqtaryn alǵa salyp, orys synybyn ashýdy talap etti. Bul jaıtty aldyn ala estigen zııaly qaýym, bir top májilismen jáne qalalyq shendiler, til janashyrlary birigip, iritkige qarsy turýǵa týra keldi. Álgi onshaqty kelinshek qazaqsha jaqsy túsinedi, jartysy sóıleıdi, biraq balalaryn orys synybyna berýge baryn saldy. Ortasynda bir jigit bar. Baıqaǵanym jáne bir kelinshektiń aıtýynsha, kúıeýi ofıer eken, soǵan qaraǵanda barlyǵy da qazaq áskeriniń qyzmetshileri sekildi. Kezek pe kezek sóılep aryndaryn basqandaı boldyq. Ásirese Aıatjan Ahmetjanulynyń sózi naqty ári sheshimge toly boldy: zań boıynsha radıýsy 2 shaqyrymǵa deıingi mańaıdaǵy kez kelgen mektep tańdaı berýge bolady eken. Sotta bul jaǵynan jeńe almaısyńdar dep Aıatjan mańdaıǵa urǵandaı etip aıtty. Al bular jańadan salynǵan Bravo turǵyn úı kesheniniń janyndaǵy 1200 oryndyq mektepti ıelengisi keledi. Úı ishinen úı tikkisi keledi. Tórt kelinshektiń esimderi - kádimgi Jámılá, Samal, Áıgerim, Sholpan! Rýlary – ýaq, qypshaq, arǵyn, bireýi rýyn bilmeıdi – reseılikpin deıdi. Bular – bizdiń sońǵy 30 jyldyq táýelsizdik dáýiriniń urpaǵy. Bulardy kinálaýǵa bola ma?! Menińshe joq. Olarǵa bir suraq qoıyp, úsh argýment aıtýlaryn suradym: Nelikten balasyn oryssha oqytpaq? Búgingi bul oqıǵa, parlamentte maıshammen qaraýǵa turatyn másele baryn ańǵartty!
