قر اقپارات جانە قوعامدىق دامۋ مينيسترلىگى مەن «ازاماتتىق باستامالاردى قولداۋ ورتالىعىنىڭ» قولداۋىمەن «ادىرنا» قورى «جاستاردى الەۋمەتتەندىرۋ جانە وڭالتۋ» جوباسى اياسىندا تەD-x فورماتىنداعى كونفەرەنتسيا مەن تالقىلاۋ الاڭىن وتكىزدى، دەپ حابارلايدى «ادىرنا» ۇلتتىق پورتالى.
ءىس-شارا ماقساتى — NEET جاستارىنىڭ قوردالانعان ماسەلەلەرىنىڭ شەشۋ جولدارىن قاراستىرىپ، جوبالىق كەڭسە تاراپىنان جاستارعا كومەك بەرۋ. سونداي-اق، جاستاردى بولاشاق ومىرىنە باعىت بەرىپ، ىنتالاندىرۋ جانە شىعارماشىلىق الەۋەتىن دامىتۋ دەيدى جوبا ۇيىمداستىرۋشىسى.
«جالپى، تەحنيكالىق سالالار بويىنشا ءبىزدىڭ ەلىمىزگە كوبىرەك جاستاردىڭ كەلگەنى جاقسى. جاراتىلىستانۋ باعىتى بويىنشا كوپتەگەن ماماندار جەتىسپەيدى. سونىڭ ورنىن شەتەلدىك ماماندار تولتىرىپ جاتىر. سول ءۇشىن جاستارعا كوبىرەك ناسيحات كەرەك», — دەدى «ادىرنا» ۇلتتىق-ەتنوگرافيالىق بىرلەستىگى قوعامدىق قورىنىڭ جەتەكشىسى ارمان اۋباكىر.
ءىس-شارا سپيكەرى «Qazaqstan» ۇلتتىق ارناسى «Ashyq alań» باعدارلاماسىنىڭ جۇرگىزۋشىسى ماقسات تولىقباي جانە بلوگەر، جۋرناليست داۋلەت مۇقاەۆ جاستارعا مانساپ جانە جەكە ءوسۋ ءۇشىن ومىرلىك داعدىلاردى دامىتۋداعى تاجىريبەلەرىمەن ءبولىستى.
«مەنىڭ بۇل جوباداعى ماقساتىم “ارەكەتكە بەرەكەت، ادام بوس جاتپاي ەڭبەكتەنۋ كەرەك” دەگەن ۇستانىممەن ءومىرى جارقىن جاققا وزگەرىپ جاتقان وقىرماندارىمدى مىسالعا الا وتىرىپ جاستارعا جىگەر بەرۋ، باعىت-باعدار بەرۋ»،-دەيدى بلوگەر، جۋرناليست داۋلەت مۇقاەۆ.
كەزدەسۋ بارىسىندا بۇگىنگى كۇنى ەڭبەك نارىعىنداعى قاجەتتى ماماندىقتار جانە قاي سالانى بەلسەندى دامىتۋ كەرەك، جاستاردى كاسىپكەرلىك قىزمەتكە وقىتۋ، كاسىپكەردىڭ قاجەتتى داعدىلارى، جاستارعا بەرىلگەن مۇمكىندىك پەن سونى قالاي دۇرىس پايدالانۋ كەرەكتىگى جايىندا ءسوز بولدى.
«جەتىستىككە جەتۋدىڭ ەشقانداي توتە جولى جوق. ءبارى ەڭبەكپەن كەلەدى. ءبىز كەيدە ۇيىقتاعاندى جاقسى كورەمىز. بىراق، جەتىستىككە جەتكىڭ كەلسە ۇيقى ماسەلەسىن ءبىرىنشى ورىنعا قويىپ، ەرتە تۇرۋدى ۇيرەنۋ كەرەك. ەكىنشى ماسەلە ءبىلىم. قانداي دا ءبىر بيزنەس اشقىڭ كەلسە، ءبىلىم ال، كۋرستارعا قاتىس. قازىر جاستارعا مۇمكىندىك كوپ.»،- دەيدى جۋرناليست ماقسات تولىقباي.
