پاۆلودار وبلىسىندا 20 ينتەرنەت-الاياقتىق اشىلدى، دەپ جازادى "ادىرنا" ۇلتتىق پورتالى. بۇل تۋرالى Polisia.kz حابارلادى.
پاۆلودار وبلىسىنىڭ پوليتسەيلەرى ءوڭىر اۋماعىندا 25-27 ءساۋىر ارالىعىندا جوعارى تەحنولوگيالار سالاسىنداعى قۇقىق بۇزۋشىلىقتاردى، زياتكەرلىك مەنشىك قۇقىقتارىنىڭ بۇزۋشىلىقتارىن، سونداي-اق كومپيۋتەرلىك اقپاراتقا زاڭسىز قول جەتكىزۋدى انىقتاۋ جانە جولىن كەسۋ ءۇشىن “كونترافاكت” جەدەل الدىن الۋ ءىس-شاراسىن وتكىزدى. ءىس-شارا بارىسىندا پوليتسەيلەر DVD-ديسكىلەردىڭ ستيحيالىق ساۋدا ورىندارىن جانە باعدارلامالىق قامتاماسىز ەتۋدى، كومپيۋتەرلىك كلۋبتار مەن ينتەرنەت-كافەلەردى تەكسەرۋدى جۇزەگە اسىردى.
وسى ءىس-شارانى وتكىزۋ ناتيجەلەرى بويىنشا جەدەل ۋاكىلدەر 20 ينتەرنەت-الاياقتىق، پورنوگرافيالىق ماتەريالداردى زاڭسىز تاراتۋدىڭ ءبىر فاكتىسى جانە كونترافاكتىلىك ونىمدەردى تاراتۋدىڭ 2 فاكتىسىن اشتى.
– مىسالى، قۇقىقتىق ءتارتىپ ساقشىلارى اقپاراتتىق جۇيەلەردى پايدالانۋ ارقىلى بوتەن ادامنىڭ اتىنا قۇنى 787 مىڭ تەڭگە بولاتىن قىمبات سمارتفون ساتىپ الۋ ءۇشىن شاعىن نەسيە بەرۋ ۇيىمى ارقىلى تاۋارلىق ونلاين-نەسيە رەسىمدەگەن 20 جاستاعى پاۆلودارلىق انىقتالىپ، ۇستالدى. 10 ەپيزود انىقتالدى. وبلىس ورتالىعىنىڭ تاعى ءبىر 28 جاستاعى تۇرعىنى الداۋ جانە سەنىمگە قيانات جاساۋ جولىمەن، اقپاراتتىق جۇيەلەردى پايدالانا وتىرىپ، تانىمال سايتتاردىڭ ءبىرى ارقىلى جوق اۆتوكولىكتى 350 مىڭ تەڭگەگە ساتتى – جەتى ەپيزودى انىقتالدى. اتالعان فاكتىلەر بويىنشا قازاقستان رەسپۋبليكاسى قك 190-بابى 2-بولىگى 4-تارماعى بويىنشا سوتقا دەيىنگى تەرگەۋ جۇرگىزىلۋدە، – دەپ حابارلادى پاۆلودار وبلىسى پد كريمينالدىق پوليتسيا باسقارماسىنىڭ باستىعى بالعاباي قاپاروۆ.
بۇدان باسقا، پوليتسيا قىزمەتكەرلەرى ينستاگرام الەۋمەتتىك جەلىسىندەگى اككاۋنتىنان پورنوگرافيالىق ماتەريالداردى stories ارقىلى زاڭسىز تاراتقان جەلەزين اۋدانىنىڭ 23 جاستاعى تۇرعىنىنا قاتىستى قازاقستان رەسپۋبليكاسى قك-ءنىڭ 311-بابى 1-بولىگى بويىنشا تەرگەۋ جۇرگىزۋدە.
"ادىرنا" ۇلتتىق پورتالى
