الەۋمەتتىك جەلىلەردە ەر ادامدار 61 جاستا، ايەلدەر 57 جاستا زەينەتكە شىعادى دەگەن اقپارات جاريالانۋدا. ءبىز بۇل اقپاراتتىڭ راس-وتىرىگىن تەكسەرىپ كورەيىك.
ۇكىم: مانيپۋلياتسيا
دالەل: قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى مۇنى جوققا شىعاردى.
بۇگىندەرى ەلىمىزدىڭ زەينەتاقى جۇيەسىنە بىرقاتار وزگەرىستەر ەنگىزىلىپ جاتىر. سولاردىڭ ءبىرى – ايەلدەردىڭ زەينەت جاسىن ۇلعايتۋ. «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» قر زاڭىنىڭ 11-بابىنا سايكەس ايەلدەردىڭ زەينەتكەرلىك جاسى 2027 جىلعا دەيىن جىل سايىن 6 ايعا ۇلعايتىلىپ وتىرادى.
بۇل وزگەرىستى جۇزەگە اسىرۋ ءۇشىن 2018-2027 جىلدار ارالىعىنداعى 10 جىل ىشىندە ايەلدەردىڭ زەينەتكەرلىك جاسىن كەزەڭ-كەزەڭىمەن 63 جاسقا دەيىن جەتكىزۋ جوسپارلانعان. ياعني بيىل قازاقستاندىق ايەلدەر 60 جاستا زەينەتكە شىققان بولسا، 2022 جىلدىڭ 1 قاڭتارىنان باستاپ 60 جاس 6 اي بولعان كەزدە عانا زەينەتكە شىعا الادى.
قر ەڭبەك مينيسترلىگىنىڭ مالىمەتىنشە، ايەلدەردىڭ زەينەتكەرلىك جاسىن كەزەڭ-كەزەڭمەن ۇلعايتۋ كوزدەلگەن:
2018 جىلعى 1 قاڭتاردان باستاپ – 58,5 جاسقا تولعاندا;
2019 جىلعى 1 قاڭتاردان باستاپ – 59 جاسقا تولعاندا;
2020 جىلعى 1 قاڭتاردان باستاپ – 59,5 جاسقا تولعاندا;
2021 جىلعى 1 قاڭتاردان باستاپ – 60 جاسقا تولعاندا;
2022 جىلعى 1 قاڭتاردان باستاپ – 60,5 جاسقا تولعاندا;
2023 جىلعى 1 قاڭتاردان باستاپ – 61 جاسقا تولعاندا;
2024 جىلعى 1 قاڭتاردان باستاپ – 61,5 جاسقا تولعاندا;
2025 جىلعى 1 قاڭتاردان باستاپ – 62 جاسقا تولعاندا;
2026 جىلعى 1 قاڭتاردان باستاپ – 62,5 جاسقا تولعاندا;
2027 جىلعى 1 قاڭتاردان باستاپ – 63 جاسقا تولعاندا.
وسىعان وراي، 1961 جىلدىڭ ەكىنشى جارتىسىندا دۇنيەگە كەلگەن نازىك جاندار 2021 جىلدىڭ سوڭىنا دەيىن زەينەتاقى تولەمدەرىن تاعايىنداۋعا ءوتىنىش بەرۋلەرى قاجەت. ءوتىنىش بەرىپ ۇلگەرمەگەن جاعدايدا تەك جارتى جىلدان كەيىن، ياعني 2022 جىلدىڭ شىلدە ايىنان كەيىن عانا زەينەتتىك دەمالىسقا شىعا الادى.
ەڭبەك مينيسترلىگى ءوز حابارلاماسىندا ءوتىنىش بەرىلگەن كۇننەن باستاپ 10 جۇمىس كۇنى ىشىندە قارالاتىنىن ەسكەرتەدى.
مەيرامگۇل ساياجانقىزى
