اقش كونگرەسىنىڭ وكىلدەر پالاتاسى لەند-ليز باعدارلاماسى بويىنشا ۋكرايناعا قارۋ-جاراق جەتكىزۋ تۋرالى زاڭ جوباسىن ماقۇلدادى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
ۋكراينا مەن شىعىس ەۋروپانىڭ باسقا دا ەلدەرىنە قورعانىس قۇرالدارىن بەرۋ مەحانيزمىن جەڭىلدەتۋدى كوزدەيتىن جوباعا كونگرەسسمەندەردىڭ كوپشىلىگى داۋىس بەرگەن. سەنات قۇجاتتى ءساۋىردىڭ باسىندا ماقۇلداعان، ەندى زاڭ جوباسى قول قويۋ ءۇشىن اقش پرەزيدەنتى دجو بايدەنگە جىبەرىلەدى.
كونگرەسستىڭ قوس پالاتاسى دا ماقۇلداعان لەند-ليز تۋرالى زاڭ ۋكرايناعا اسكەري كومەك كورسەتۋدى جەڭىلدەتۋگە ارنالعان. ول "قورعانىس تەحنيكاسىن بەرۋ بويىنشا پرەزيدەنت وكىلەتىنە قاتىستى تالاپتاردى ۋاقىتشا الىپ تاستايدى", دەلىنگەن اقش كونگرەسى سايتىنداعى قۇجاتتا.
بۇعان دەيىن اقش پرەزيدەنتى دجو بايدەن كونگرەسسكە ۋكرايناعا جاڭا كومەك رەتىندە قوسىمشا 33 ميلليارد دوللار ءبولۋ تۋرالى ءوتىنىش جولداعان.
“ادىرنا” ۇلتتىق پورتالى
