قازاقستاندىق وقۋشىلار اقش-تا وتكەن روبوتتەحنيكا بويىنشا چەمپيوناتتا باس جۇلدەگە يە بولدى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
20-23 ءساۋىر ارالىعىندا حيۋستوندا (اقش) 7-9 جاس ارالىعىندا روبوتتەحنيكا بويىنشا FIRST LEGO LEAGUE الەم چەمپيوناتى ءوتتى. 2022 جىلى الەمنىڭ تۇكپىر-تۇكپىرىنەن كەلگەن وقۋشىلارعا ارنالعان جارىستىڭ تاقىرىبى - جۇك تاسىمالى بولدى.
الەمدىك فورۋمدا LEAS قوسىمشا ءبىلىم بەرۋ ورتالىعىنىڭ اتىنان قازاقستان كومانداسى ونەر كورسەتتى. الماتىدان بارعان وقۋشىلار ءتيىمدى جۇك تاسىمالدارىنا بايلانىستى پروبلەمالاردى شەشۋدىڭ بىرنەشە جولىن ۇسىندى، ولاردىڭ اراسىندا دروندارى بار پويىز دا بولدى. ولار ەڭ باستى نوميناتسيادا - Challenge Solution Award - "ەڭ ۇزدىك جوبالىق شەشىم" بويىنشا جەڭىسكە جەتتى.
"ولار جۇك تاسىمالدارىن، جۇك تاسىمالداۋدىڭ قانداي تاسىلدەرى بار ەكەنىن، باسقا وڭىرلەردە جەتكىزۋ قالاي جولعا قويىلعانىن، بۇگىندە قانداي يننوۆاتسيالىق شەشىمدەر بار ەكەنىن زەرتتەدى. بالالار يدەيالار ويلاپ تاۋىپ، ولاردى مۇقيات پىسىقتادى. ۇزاق ۋاقىت دايىندالدى. نەگىزگى قيىندىقتاردىڭ ءبىرى - اعىلشىن تىلىمەن جۇمىس جاساۋ دەپ ايتۋعا بولادى. ءبىزدىڭ دايىندىق، كورسەتكەن يدەيامىز سۋديالارعا ۇلكەن اسەر قالدىردى، ولار بىزگە تاماشا پىكىرلەر جازدى", - دەپ ءبولىستى ماقاجانوۆ تىلشىگە بەرگەن سۇحباتىندا.
روبوتوتەحنيكا بويىنشا الەم چەمپيوناتىندا الەمنىڭ تۇكپىر-تۇكپىرىنەن 60 كوماندا قاتىستى، الايدا قازاقستاندىق بالالاردىڭ جوباسى ەڭ ۇزدىك اتاققا يە بولدى.
4D اتتى كوماندادا الماتىلىق ءتورت بالا - دەنيەل كيم، دەميد بوبورەنكو، دانيال مۇراتوۆ جانە ديار ادام ايبار بولدى.
"قازاقستانداعى كولىكتىڭ نەگىزگى تۇرلەرىنىڭ ءبىرى - تەمىرجول. ۇلكەن اۋماقتا كوپ قالا جوق، سوندىقتان شاعىن قالالارعا تاۋاپ جەتكىزۋدى جەڭىلدەتۋ ءۇشىن ءبىز دروندارى بار پويىز جاسادىق. پويىز بەلگىلى ءبىر ستانتسياعا جاقىنداعاندا، دروندار ودان ۇشىپ شىعىپ، ارنايى "درون قابىلداۋ بازاسىنا" بارادى. سول جەرگە سالەمدەمەلەردى قالدىرىپ، ودان ارى پويىزعا ورالادى. بۇل سالەمدەمەلەردى جەتكىزۋدى جانە وڭدەۋدى تەزدەتەدى", - دەپ ءتۇسىندىردى دانيەل كيم.
بۇل يدەياعا امەريكالىق Google كورپوراتسياسى دا قىزىعۋشىلىق تانىتىپ وتىرعانى ايتىلدى. قورپوراتسيا وكىلدەرى قازاقستاندىق چەمپيونداردى بولاشاقتا Google-عا جەتەكشى ينجەنەر بولۋعا شاقىرعان ەكەن.
“ادىرنا” ۇلتتىق پورتالى
