پرەزيدەنتتىڭ ءباسپاسوز حاتشىسى رۋسلان جەلدىباي facebook پاراقشاسىندا مەملەكەت باسشىسى توقاەۆ ءوز ءجىتى باقىلاۋىنا العان ماسەلەنى اتادى، دەپ حابارلايدى “ادىرنا” ۇلتتىق پورتالى.
“بۇگىن مەملەكەت باسشىسى قاسىم-جومارت توقاەۆ «Egemen Qazaqstan» گازەتىندە جاريالانعان «كۇرە جولداعى كۇرسىنىس» اتتى ماقالاعا نازار اۋداردى.
باسىلىم باتىس قازاقستان وبلىسىنداعى كۇرە جولدار جاعدايىنىڭ ناشارلىعىنا بايلانىستى ماسەلە كوتەرگەن. پرەزيدەنت بۇل ءوڭىردىڭ كولىك-لوگيستيكالىق الەۋەتىن جاڭعىرتۋ ماڭىزدى مىندەتتىڭ ءبىرى ەكەنىن جانە اۆتوجولداردىڭ 70 پايىزىنىڭ ساپاسى سىن كوتەرمەيتىنىن 2019 جىلى ايتقان بولاتىن. مەملەكەت باسشىسى ورالدا وتكەن كەزدەسۋدە «بۇل ازاماتتاردىڭ كۇندەلىكتى ومىرىندە قيىندىق تۋعىزىپ قانا قويمايدى، سونداي-اق ءوڭىردىڭ ەكسپورتتىق جانە ترانزيتتىك الەۋەتىن تومەندەتەدى» دەگەن ەدى.
پرەزيدەنت سول كەزدە ۇكىمەتكە اكىمدىكپەن بىرلەسىپ، قازتالوۆ، جانىبەك جانە بوكەي ورداسى اۋداندارىنداعى جولداردى جوندەۋ جۇمىستارىن 2021 جىلدىڭ سوڭىنا دەيىن اياقتاۋعا تاپسىرما بەردى جانە بۇل ماسەلە ءوزىنىڭ جەكە باقىلاۋىندا بولاتىنىن ەرەكشە اتاپ ءوتتى.
الايدا «Egemen Qazaqstan» گازەتىندەگى مالىمەتتەر بويىنشا وسى اۋدانداردى وبلىس ورتالىعىمەن بايلانىستىراتىن جولدارعا ءالى كۇنگە دەيىن اسفالت توسەلمەگەن. قۇرىلىس جۇمىستارى بەكىتىلگەن كەستەدەن ايتارلىقتاي قالىپ كەلەدى جانە قارجى ماسەلەسىندە دە تۇيتكىلدەر بار.
جەرگىلىكتى تۇرعىندار جولدىڭ جوقتىعىنان زارداپ شەگىپ وتىر، اسىرەسە كوكتەم مەن كۇزدە جاعداي مۇلدە ۋشىعا تۇسەدى.
مەملەكەت باسشىسى ۇكىمەت پەن وبلىس اكىمدىگىنە بارلىق قاجەتتى شارانى تەز ارادا قابىلداۋدى تاپسىردى. ءتيىستى جۇمىستاردىڭ بەلگىلەنگەن مەرزىمدە ورىندالماۋىنا كىنالىلەر جازالانۋعا ءتيىس.
پرەزيدەنت بۇل ماسەلەنى شەشۋدى پرەمەر-مينيستر ءاليحان سمايىلوۆقا جۇكتەدى”،- دەپ جازدى ول.
“ادىرنا” ۇلتتىق پورتالى
