بلوگەرلەردىڭ قىمبات تۇراتىن كۋرسىن ساتىپ الىپ، شاعىمدانىپ جاتقان الماتىلىقتاردىڭ قاراسى كوبەيدى، دەپ حابارلايدى “ادىرنا” ۇلتتىق پورتالى الماتى تەلەارناسىنا سىلتەمە جاساپ.
اياقتالماعان كۋرستاردىڭ اقشاسىن قايتارۋدى 20 ادام تالاپ ەتىپ وتىر. ول ءۇشىن ولار كومپانيانىڭ كەڭسەسىنە باسىپ كىردى.
"بۇل Pro-land كومپانياسى. وفلاين ساباعى 500 مىڭ تەڭگە تۇرادى. ساباق نەگىزى 70 كۇن ءوتۋى كەرەك بولاتىن. بىراق 2 ايعا تولماي، توقتاپ قالدى. ساباق نەگە توقتاپ قالعانىن ەشكىم تۇسىندىرگەن جوق. ارى قاراي نە بولادى؟ ءبىز اقشانى قايتارۋدى سۇرادىق. بىراق ولار حابارلاسپادى، جاۋاپ بەرمەدى. پوليتسيا شاقىرىپ، ارىز جازۋعا ءماجبۇر بولدىق", - دەيدى تاعى ءبىر قالا تۇرعىنى عازيزا بايداۋلەت.
Pro-land كەڭسەسىنىڭ الدىنا جينالعانداردىڭ ايتۋىنشا، ولاردىڭ اراسىندا باسقا بلوگەردەن زارداپ شەككەندەر دە بار. ادامدار كۋرستا الىنعان اقپاراتتىڭ ءتيىمسىز ەكەنىن جانە ولاردىڭ ءۇمىتىن اقتامايتىنىن ايتتى.
"جۇلدىز اقبولات حانىمنىڭ كۋرسىن الىپ وتىرمىز، تەگىن ۆەبينار دەدى. جارايدى دەدىك. اقىرى اقشا تابۋ ءۇشىن جۇرگەن ادام بولعاندىقتان. ءبىز سياقتى قانشاما ادام جىلاپ وتىر", - دەيدى قالا تۇرعىنى زارينا مادىبەكوۆا.
ال باسى داۋعا قالعان كومپانيانىڭ زاڭگەرى شاعىمدانۋشى تاراپتىڭ ارىزى ورىنسىز دەپ وتىر. سوزىنشە، ءبىلىم الۋعا بەكىنگەن ازاماتتار تاپسىرمانى تولىق ورىندامادى دەيدى.
"ول نيشالارىنا ساي كەلمەيدى. تابىس تاپقان جوقپىز دەپ شاعىم ايتىپ جاتىر. وزدەرىنىڭ تاراپىنان ول كىسىلەر تاپسىرمالاردى ورىنداۋ كەرەك بولعان. كومپانيانىڭ اتىنان جانە جۇلدىز حانىمنىڭ اتىنان بارلىق شارت ورىندالدى. ساباقتىڭ ءبارى سايتتا تۇر. سەگىز مودۋلدان تۇرادى", - دەيدى زاڭگەر سالتانات ديحانباەۆا.
تەلەارنانىڭ مالىمەتىنشە، پوليتسيا دەپارتامەنتى بۇل فاكت بويىنشا تەكسەرۋ جۇرگىزگەن. الايدا ءتارتىپ ساقشىلارى بۇل ازاماتتىق ءىس بولعاندىقتان ەشكىمدى ۇستامادى، سوندىقتان داۋدى سوت ارقىلى شەشۋدى ۇسىندى.
“ادىرنا” ۇلتتىق پورتالى
