15 ءساۋىر كۇنى الماتى قالاسى، ۇلتتىق كىتاپحانانىڭ ن.داۋلەتوۆ اتىنداعى زالىندا ەتنوگراف، جازۋشى زەينوللا سانىكتىڭ «حالىق مۇراسىنىڭ جاناشىرى» جانە «دانەكەر تۇلعا» اتتى قوس كىتابىنىڭ تۇساۋكەسەرى ءوتتى. ءىس-شارانى زەينوللا سانىك اتىنداعى مادەنيەت قورى تانىمال قالامگەردىڭ تۋعان كۇنىنە وراي ۇيىمداستىردى.
ءىس-شارا ەكى بولىمنەن تۇردى. العاشقى بولىمدە – زەينوللا سانىكتىڭ جارى، جازۋشى اتىنداعى مادەنيەت قورىنىڭ پرەزيدەنتى شامشابانۋ حامزاقىزى، م.و.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجان، قازاقستان جازۋشىلار وداعى باسقارماسىنىڭ توراعاسى ۇلىقبەك ەسداۋلەت، شىعىستانۋ ينستيتۋتىنىڭ ديرەكتورى دۇكەن ءماسىمحانۇلى قۇتتىقتاۋ ءسوز سويلەدى. ال ەكىنشى ءبولىمى — عىلىمي-تاجىريبەلىك كونفەرەنتسيا فورماتىندا ءوتتى. مۇندا ادەبيەتتانۋشىلار مەن جازۋشىنىڭ شىعارماشىلىعىن زەرتتەپ جۇرگەن ماگيسترانتتار بايانداما جاسادى. كەشتى جۋرناليست جارقىن سالەنۇلى جۇرگىزدى.
«حالىق مۇراسىنىڭ جاناشىرى» كىتابى – جازۋشى تۋرالى عىلىمي وي-تۇجىرىمدار مەن قورىتىندىلاردان قۇرالعان. اۆتورى — فولكلورتانۋشى دۇيسەنگۇل جاھان. مۇندا زەينوللا سانىكتىڭ ەتنوگرافيالىق-فولكلورلىق مۇراسى جۇيەلى تۇردە تالدانعان. سونىڭ ىشىندە قىتايداعى قانداستارىمىز تۋرالى اقپاراتتاردىڭ جينالۋى مەن زەرتتەلۋى، جاريالانۋى مەن تالدانۋى جونىندە عىلىمي-تانىمدىق تۇرعىدان قاراستىرىلادى.
ال «دانەكەر تۇلعا» ەڭبەگىندە جازۋشىنىڭ ءومىرى مەن شىعارماشىلىعىنا ارنالعان ەستەلىكتەر مەن زەرتتەۋ ماقالالار جاريالانعان. بۇدان بولەك زەينوللا سانىكتىڭ ەستەلىكتەرىن بەرۋ ارقىلى شەتەلدەگى قازاق ادەبيەتى مەن تاريحي تۇلعالارى تۋرالى باسقا جەردە جاريالانباعان تىڭ اقپاراتتار ايتىلادى.
ايتا كەتەيىك، ءىس-شاراعا نۇر-سۇلتان، الماتى، سەمەي، اقتوبە، شىمكەنت، قىزىلوردا، تالدىقورعان جانە تاعى ەلىمىزدىڭ باسقا دا قالالارىنان ادەبيەتتانۋشىلار مەن فولكلورتانۋشىلار، ادەبيەت جانە عىلىمي ينستيتۋتتاردىڭ باسشىلارى مەن قىزمەتكەرلەرى، مۇعالىمدەر مەن وقۋشىلار، پروفەسسورلار مەن جاس عالىمدار قاتىستى. ولاردىڭ ءبىرازى جازۋشىنىڭ شىعارماشىلىعى تۋرالى ءسوز سويلەپ، وقىرمان قاۋىمعا زەينوللا سانىكتىڭ تۇلعالىق بولمىسى مەن ەڭبەگىن تانىتتى.
