15 sáýir kúni Almaty qalasy, Ulttyq kitaphananyń N.Dáýletov atyndaǵy zalynda etnograf, jazýshy Zeınolla Sániktiń «Halyq murasynyń janashyry» jáne «Dáneker tulǵa» atty qos kitabynyń tusaýkeseri ótti. Is-sharany Zeınolla Sánik atyndaǵy Mádenıet qory tanymal qalamgerdiń týǵan kúnine oraı uıymdastyrdy.
Is-shara eki bólimnen turdy. Alǵashqy bólimde – Zeınolla Sániktiń jary, jazýshy atyndaǵy Mádenıet qorynyń prezıdenti Shamshabaný Hamzaqyzy, M.O.Áýezov atyndaǵy Ádebıet jáne óner ınstıtýtynyń dırektory Kenjehan Matyjan, Qazaqstan Jazýshylar odaǵy basqarmasynyń tóraǵasy Ulyqbek Esdáýlet, Shyǵystaný ınstıtýtynyń dırektory Dúken Másimhanuly quttyqtaý sóz sóıledi. Al ekinshi bólimi — ǵylymı-tájirıbelik konferenııa formatynda ótti. Munda ádebıettanýshylar men jazýshynyń shyǵarmashylyǵyn zerttep júrgen magıstranttar baıandama jasady. Keshti jýrnalıst Jarqyn Sálenuly júrgizdi.
«Halyq murasynyń janashyry» kitaby – jazýshy týraly ǵylymı oı-tujyrymdar men qorytyndylardan quralǵan. Avtory — folklortanýshy Dúısengúl Jahan. Munda Zeınolla Sániktiń etnografııalyq-folklorlyq murasy júıeli túrde taldanǵan. Sonyń ishinde Qytaıdaǵy qandastarymyz týraly aqparattardyń jınalýy men zerttelýi, jarııalanýy men taldanýy jóninde ǵylymı-tanymdyq turǵydan qarastyrylady.
Al «Dáneker tulǵa» eńbeginde jazýshynyń ómiri men shyǵarmashylyǵyna arnalǵan estelikter men zertteý maqalalar jarııalanǵan. Budan bólek Zeınolla Sániktiń estelikterin berý arqyly sheteldegi qazaq ádebıeti men tarıhı tulǵalary týraly basqa jerde jarııalanbaǵan tyń aqparattar aıtylady.
Aıta keteıik, is-sharaǵa Nur-Sultan, Almaty, Semeı, Aqtóbe, Shymkent, Qyzylorda, Taldyqorǵan jáne taǵy elimizdiń basqa da qalalarynan ádebıettanýshylar men folklortanýshylar, ádebıet jáne ǵylymı ınstıtýttardyń basshylary men qyzmetkerleri, muǵalimder men oqýshylar, professorlar men jas ǵalymdar qatysty. Olardyń birazy jazýshynyń shyǵarmashylyǵy týraly sóz sóılep, oqyrman qaýymǵa Zeınolla Sániktiń tulǵalyq bolmysy men eńbegin tanytty.
