ماعزۇم مىرزاعاليەۆ پرەزيدەنتتىڭ كەڭەسشىسى قىزمەتىنەن بوساتىلدى

ماعزۇم مىرزاعاليەۆ پرەزيدەنتتىڭ كەڭەسشىسى قىزمەتىنەن بوساتىلدى، - دەپ حابارلايدى اقوردا.

"مەملەكەت باسشىسىنىڭ وكىمىمەن ماعزۇم ماراتۇلى مىرزاعاليەۆ قازاقستان رەسپۋبليكاسى پرەزيدەنتىنىڭ كەڭەسشىسى لاۋازىمىنان بوساتىلدى", - دەلىنگەن جارلىقتا.

ماعزۇم مىرزاعاليەۆ 2022 جىلى قاڭتاردا پرەزيدەنت كەڭەسشىسى بولىپ تاعايىندالعان. ايتا كەتەيىك، بۇعان دەيىن ماعزۇم مىرزاعاليەۆ ەنەرگەتيكا ءمينيسترى قىزمەتىندە 4 اي قىزمەت ەتكەن بولاتىن.

ماعزۇم مىرزاعاليەۆ 1978 جىلى 7 قاراشادا الماتىدا دۇنيەگە كەلگەن. 1999 جىلى "تۇران" ۋنيۆەرسيتەتىن "ەكونوميست" ماماندىعى بويىنشا تامامداعان. ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ حالىقارالىق قاتىناستار سالاسىنداعى ديپلوماتيالىق اكادەمياسىندا وقىدى. ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىندە "مۇناي-گاز كەن ورىندارىن يگەرۋ" ماماندىعى بويىنشا ءبىلىم العان.

ەڭبەك ءوتىلىن تەڭىز كەن ورىندارىندا جانە باتىس سىبىردە بۇرعىلاۋ ەرىتىندىلەرى جونىندەگى ينجەنەر بولىپ باستادى، اقش پەن مالايزيادا تاعىلىمدامادان ءوتتى.

2004-2007 جىلدارى MI Drilling Fluids International اقتاۋ فيليالىنىڭ ءوندىرىس جونىندەگى مەنەدجەرى - باسشىسى بولىپ جۇمىس ىستەدى. 2010 جىلعا دەيىن " تەڭىزسەرۆيس "جشس باس ديرەكتورى بولىپ قىزمەت ەتتى.

2010-2012 جىلدارى - "قازمۇنايگاز "ۇك" اق سەرۆيستىك جوبالار جونىندەگى باسقارۋشى ديرەكتورى، كەيىننەن "قازمۇنايگاز"ۇك" اق يننوۆاتسيالىق دامۋ جانە سەرۆيستىك جوبالار جونىندەگى باسقارما توراعاسىنىڭ ورىنباسارى قىزمەتىن اتقاردى.

2013 جىلدىڭ قازان ايىنان باستاپ مۇناي جانە گاز ۆيتسە-ءمينيسترى، 2014 جىلدىڭ تامىز ايىنان باستاپ ەنەرگەتيكا ۆيتسە-ءمينيسترى بولدى. "قۇرمەت" وردەنىمەن جانە ەكى مەدالمەن ماراپاتتالعان.

”ادىرنا” ۇلتتىق پورتالى