ەگەر ءادىل سايلاۋ بولسا، امانات پارتياسى جەڭىسكە جەتپەيدى - مۇحتار تايجان

2129
Adyrna.kz Telegram

«جاڭا قازاقستاندى ەسكى كىرپىشپەن قالاي الامىز با؟» — دەگەن تاقىرىپ توڭىرەگىندە اڭگىمە قوزعاعان «HARD-talk» جوباسىنىڭ 3-شىعارىلىمىندا مۇحتار تايجان «امانات» پارتياسى قاتىستى وقيعالارعا پىكىر ءبىلدىردى، — دەپ حابارلايدى “ادىرنا” ۇلتتىق پورتالى Kznews.kz سايتىنا سىلتەمە جاساپ. 

م.تايجان سۇحبات بارىسىندا اتاۋى وزگەرتىلگەن پارتيانىڭ سايلاۋداعى جاعدايى، باسەكەگە قابىلەتتىلىگى، جەمقورلىقپەن كۇرەسى، بيلىك وكىلدەرىن جاقتايتىن ادەتى تۋرالى سۇراقتارعا جاۋاپ بەردى.

«ەگەر ءادىل سايلاۋ بولسا، امانات پارتياسى جەڭىسكە جەتپەيدى، ولار باسەكەگە قابىلەتتى ەمەس. شىنىمەن سايلاۋ ءوز ەرەجەلەرىنە ساي وتسە، وندا بۇل پارتيا نەبارى 10% داۋىس جينار ەدى. سەبەبى حالىقتىڭ كوڭىلى نۇر-وتاننان باياعىدا قالىپ قويعان. 30 جىلدا، ارينە، پايداسى دا بولعان شىعار، الايدا جاماندىعى باسىمىراق.
ويلاپ قاراساڭىزدار، قازىرگى تاڭدا پرەزيدەنتتىك سايلاۋ تۋرالى مۇلدەم ءسوز قوزعالمايدى. ونداعى ەرەجەدە ەل باسشىسىنىڭ ورنىنا تەك 5 جىل شەنەۋنىك بولعان ادام عانا ۇمىتكەر بولا الادى. ەندى قاراڭىز، جۋرناليست، ەكونوميست سياقتى مامان يەلەرى بۇل تۋرالى ويلاماسا دا بولادى. ەندەشە پرەزيدەنتتىك سايلاۋعا حالىقتىڭ نەبارى 1%-ى عانا تۇسە الادى دەگەن ءسوز.

جەمقورلىقپەن كۇرەسەتىن ادامنىڭ ەكونوميكاداعى ءرولىن ازايتۋ كەرەك. سەبەبى اقشا بار جەردە جەمقورلىق قوسا جۇرەدى. پرەزيدەنتتىڭ «سامۇرىق — قازىنا» كومپانياسى مەن «بايتەرەك» حولدينگىن قالدىرۋى — ۇلكەن قاتەلىك. بۇلار — جەمقورلىقتىڭ ناعىز وشاعى. سەبەبى مەملەكەتتىڭ قاراجاتى سول ۇيىمدا ساقتالادى. ولارعا انتيكور تەكسەرىس جۇرگىزە المايدى. امانات پارتياسىنىڭ سىبايلاس جەمقورلىققا قارسى كۇرەس جۇرگىزەدى دەگەنى وتىرىك اڭگىمە. ول مەنىڭ پىكىرىم ەمەس، ول — اكسيوما.

جاعىمپازدىق امانات پارتياسى ءۇشىن داستۇرگە الدەقاشان اينالعان. پارتيانىڭ قازىرگى مۇشەلەرى بۇرىنعى ورىن العان كەلەڭسىزدىكتەردىڭ جاۋاپكەرشىلىگىنەن قاشپاۋى كەرەك. ەۋرازيالىق وداققا كىرۋ — سول پارتيانىڭ شەشىمى بولدى. ەندەشە جاڭادان كەلگەن مۇشەلەرى «ءبىز بۇرىنعىنى قالامايمىز، مىنا دۇنيەلەردى قۇپتامايمىز، ول ءۇشىن وسىنداي جاڭا قادامدار جاساپ جاتىرمىز» دەپ بارلىعىن ناقتىلاۋى ءتيىس. سىزدەر ءالى كۇنگە دەيىن ن.ءا.نازارباەۆتى تاريحي تۇلعا دەپ ەسەپتەيسىزدەر. ماسەلەن، ەلباسىعا قاتىستى زاڭدى ءوشىرىپ تاستامايسىزدار. وشانوۆقا جۋرناليستەر «نەگە زاڭ كۇشىن جويمايدى؟» -دەپ سۇراق قويسا، ول «نازارباەۆ — تاريحي تۇلعا» دەپ جاۋاپ بەرەدى. گەننادي، چەرچيلدەر دە تاريحي تۇلعا بولعانىمەن، ولاردىڭ وتباسىنا، بايلىقتارىنا قاتىستى ناقتى زاڭ قابىلدانبادى. ەگەر شىنىمەن پارتيا بەيتاراپ ساياسات ۇستانسا، وندا باسقا شەشىمدەر قابىلداعانى ءجون. سەبەبى قازاقستاندا دا زاڭ الدىندا بارلىق وتباسى تەڭ بولۋى ءتيىس»، — دەدى مۇحتار تايجان.

“ادىرنا” ۇلتتىق پورتالى

پىكىرلەر