تۇركىمەنستاندا ايەلدەرگە بوتوكس، كىرپىك ۇزارتۋ، تىرناق جانە تاتۋيروۆكا سالدىرتقانى ءۇشىن ايىپپۇل سالىنۋى مۇمكىن، دەپ حابارلايدى "ادىرنا" ۇلتتىق پورتالى.
سۇلۋلىق سالوندارىنىڭ تۇتىنۋشىلارى زاڭدى بۇزعانى ءۇشىن 300-500 مانات (38 000 - 64 000 تەڭگە) كولەمىندە ايىپپۇل تولەيدى. ال شەبەرلەر كورسەتكەن قىزمەتى ءۇشىن ءتىپتى 15 تاۋلىككە قاماۋعا الىنادى.
سالون قىزمەتكەرلەرى مۇنداي تىيىمدار سالىنعان جاعدايدا قالىپتى جۇمىس ىستەپ، ناپاقا تابا المايمىز دەپ شاعىمدانۋدا.
«سەردار بەردىمۇحامەدۆ پرەزيدەنتتىككە كىرىسۋىمەن كارانتيندىك شەكتەۋلەردى الىپ تاستاي باستاعاننان كەيىن ءبىز جۇمىسقا ەندى عانا ورالدىق. بىراق جۇمىسىمىز تاعى دا شەكتەلدى. ال ەندى نەگە ءبىز دە بازارعا بارىپ قايىر سۇراۋىمىز كەرەك؟ وسىلايشا ءبىز كارانتين كەزىندە قارىزعا باتتىق، ولاردى وتەۋگە ءالى ۇلگەرمەدىك. ەندى جۇمىس ىستەيمىز بە دەگەندە، مىناداي شەكتەۋلەر قويىلىپ جاتىر»، - دەيدى سۇلۋلىق سالونىنىڭ قىزمەتكەرلەرى.
تۇركىمەنستان بيلىگى تىيىم سالعان كوسمەتيكالىق قىزمەتتەر الەمنىڭ كوپتەگەن ەلدەرىندە قالىپتى ءراسىم بولىپ سانالادى جانە ايەلدەر ونى ەش كەدەرگىسىز قابىلدايدى.
بىراق تۇركىمەنستاندا كوپتەگەن جىلدار بويى ايەلدەرگە سۇلۋلىق سالوندارىنىڭ كەيبىر قىزمەتتەرىن پايدالانۋعا تىيىم سالىنعان. بۇل تىيىمدار ادەتتە ۇكىمەتتەگى جوعارى لاۋازىمدى ادام، اتاپ ايتقاندا ىشكى ىستەر ءمينيسترى اۋىسقاندا كۇشەيتىلەدى.
"ادىرنا" ۇلتتىق پورتالى
