قازاقستانداعى ورىستار ۇلتى مەن فاميلياسىن اۋىستىرۋعا ءوتىنىش تاستادى

10093
Adyrna.kz Telegram

ورىستار ادىلەت مينيسترىنەن ۇلتى مەن فاميلياسىن وزگەرتۋگە بولا ما دەگەن ساۋال جولدادى، دەپ حابارلايدى “ادىرنا” ۇلتتىق پورتالى.

ۆيكتور كالگين ەسىمدى ازامات ءوز وتىنىشىندە بىلاي جازعان:

«رەسەي ارمياسى ۋكرايناعا باسىپ كىرگەنىن ەلدىڭ ءبارى ءبىلىپ، كورىپ وتىر. وسىنىڭ كەسىرىنەن دۇنيەجۇزىندە ورىستارعا دەگەن تەرىس كوزقاراس قالىپتاسىپ جاتىر. قازىر بۇكىل الەم قاي ەلدە تۇرىپ جاتقانىمىزعا، رەسەيدىڭ اسكەري وپەراتسياسىنا كوزقاراسىمىزعا قاراماستان، ورىس ەكەنىڭدى بىلسە تەرىس اينالادى. كوپ ادام ورىس بولعانى ءۇشىن ۇيالاتىن جاعدايعا جەتتى. كەيبىرىمىز ءومىرىمىز مەن دەنساۋلىعىمىز ءۇشىن قورقا باستادىق. ەگەر ورىس ادامدى تۇرىنە قاراپ، ەۋروپالىق ءناسىلدىڭ باسقا وكىلدەرىنەن ايىرۋ قيىن بولسا، وندا ونىڭ فاميلياسىنا قاراپ، تەز ايىرۋعا بولادى. سەبەبى ورىستاردىڭ كوبىسىنىڭ اتا-تەگى -ەۆ، -وۆ، -ين جالعاۋلارىمەن اياقتالادى. بولاشاقتا مەن ەۋروپاعا تۋريستىك ساپار جاساۋدى جوسپارلاعانمىن. ەندى مەنى ورىس بولعانىم ءۇشىن قوناقۇي، ءدامحانا، دۇكەن مەن باسقا دا ورىنداردا جەككورە مە دەپ قورقامىن. قازىر ەۋروپادا تۇراتىن ورىستاردا سونداي جاعداي بولىپ جاتىر ەكەن» دەپ جازعان ۆيكتور كالگين.

«مەن فاميليام مەن ۇلتىمدى اۋىستىرعىم كەلىپ وتىر. بىراق قالاي اۋىستىرۋدى بىلمەي وتىرمىن. فاميليامەن مەن ۇلتىمدى اۋىستىرۋعا مۇمكىندىك بار ما؟» – دەپ سۇرادى ءوتىنىش يەسى.

قانات مۋسين:

«قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى زاڭىنىڭ «اۋداندىق (وبلىستىق ماڭىزى بار قالالىق) اكىمدىكتىڭ قۇزىرەتى» اتالاتىن 31-بابىنىڭ 1-ءبولىمىنىڭ 2-2 تارماقشاسىنا سايكەس، جەرگىلىكتى اۋداندىق نەمەسە قالالىق اكىمدىك قازاقستان زاڭناماسىندا بەلگىلەنگەن تارتىپپەن ازاماتتىق حال اكتىلەرىن تىركەۋدى جۇزەگە اسىرادى جانە تىركەۋ تۋرالى مالىمەتتەردى جەكە تۇلعالار تۋرالى مەملەكەتتىك دەرەكقورعا ەنگىزەدى. وسىعان بايلانىستى ماسەلەڭىزدى شەشۋ ءۇشىن ءوز ءوڭىرىڭىزدىڭ اكىمدىگىنە جۇگىنۋگە كەڭەس بەرەمىز»، – دەدى ول.

”ادىرنا” ۇلتتىق پورتالى

پىكىرلەر