قر ورتالىق سايلاۋ كوميسسياسى العاش رەت ەل اۋماعىندا حالىقپەن كەزدەسۋ وتكىزىپ جاتىر. اتالمىش ۆەدومستۆو وكىلدەرى بۇعان دەيىن ەلدىڭ 8 وبلىسىندا اۋقىمدى جيىندار وتكىزگەن. ەندىگى كەزەكتە ولار الماتى وبلىسىنا دا بولادى، دەپ حابارلايدى “ادىرنا” ۇلتتىق پورتالى.
ارنايى ءىس-ساپار بارىسىندا قر ورتالىق سايلاۋ كوميسسياسىنىڭ توراعاسى نۇرلان ءماجيتۇلى جەتىسۋ جۇرتىمەن اشىق ديالوگ وتكىزدى. باستى ماقسات- مەملەكەت باسشىسىنىڭ 2020 جىلعى جولداۋىندا سايلاۋعا قاتىستى ايتىلعان تاپسىرمالارىن جۇزەگە اسىرۋ.
پرەزيدەنتتىڭ حالىققا جولدانۋىندا، اۋىل اكىمدەرىن تىكەلەي سايلاۋ باستاماسى كوتەرىلگەن بولاتىن. سونىڭ ناتيجەسىندە، 935 اۋىل اكىمىن تىكەلەي سايلاۋ ناۋقانى وتكىزىلدى. وتكەن جىلى 25 شىلدە دە 736 اكىم سايلانعان ەدى. ەندىگى كەزەكتە قاسىم-جومارت كەمەلۇلى 2023 جىلى اۋدان اكىمدەرىن تىكەلەي سايلاۋ پيلوتتىق جوبا رەتىندە جۇزەگە اساتىنىن ايتتى. سوندىقتان دا، بۇل كەزدەسۋ الداعى ساياسي دودا الدىنداعى دايىندىقتىڭ العاشقى ساتىسى بولىپ تابىلادى.
كەزدەسۋدە ءسوز العان نۇرلان ءابدىروۆ، پرەزيدەنتتىڭ سايلاۋدى جاڭا فورماتقا كوشىرۋ كەرەكتىگى تۋرالى ايتقاندىعىن اتاپ ءوتتى.
«قاسىم-جومارت توقاەۆ ەلمەن كەزدەسىپ، ولاردىڭ مۇڭ-مۇقتاجىن ەستۋ كەرەك. ۇسىنىستارى بولسا تىڭداپ، ەسكەرۋ قاجەت. نەگىزگى ماسەلە - سايلاۋ پروتسەسسىن جەتىلدىرۋ، قوعامنىڭ سۇرانىستارىنا قاراي وسىنى ۇيىمداستىرىپ، الداعى سايلاۋ ناۋقاندارىن زاڭعا سۇيەنە وتىرا قامتاماسىز ەتۋ قاجەت دەپ تاپسىرماسىن بەردى»،-دەدى قر ورتالىق سايلاۋ كوميسسياسىنىڭ توراعاسى.
جيىندا سايلاۋ ناۋقانىنداعى جۇيەلەردىڭ ءبىر ىزدىلىگى، كوميسسيا قۇرامى مەن ساياسي دودانى وتكىزۋدەگى ادىلدىكتى قامتاماسىز ەتۋ سىندى بىرقاتار سۇراقتار كوتەرىلىپ، تۇرعىندار تاراپىنان ۇسىنىستاردا ايتىلدى.
كەزدەسۋدە العاشقى ۇسىنىس، الماتى وبلىسى قوعامدىق پالاتاسىنىڭ توراعاسى بولات ءابىشۇلىنىڭ تاراپىنان ءتۇستى. ول سەنات دەپۋتاتتارىنىڭ سايلاۋىنا ءار وڭىردەگى قوعامدىق كەڭەستىڭ ءبىر مۇشەسى سايلانۋى كەرەك دەگەن ۇسىنىسىن جەتكىزدى. ونىڭ پايىمىنشا، سوندا عانا سەنات-حالىقتىق دەگەن اتقا يە بولادى. كەلەسى كەزەكتە، رەسپۋبليكالىق باقىلاۋشىلار ۇيىمىنىڭ مۇشەسى ەرمەك ەشمۇحامەتوۆ حالىقتىڭ سايۋلاۋدىڭ ادىلدىگىنە سەنبەيتىندىگىن سونىمەن قاتار، ناۋقان كەزىندە اۋماقتىق سايلاۋ كوميسسيا مۇشەلەرىنىڭ پەندەشىلىككە سالىناتىنىن اشىپ ايتتى. ول، سايلاۋ كوميسسيالارىنىڭ مۇشەلەرى رەتىندە مەملەكەتتەن جالاقى المايتىن، بيلىككە تاۋەلسىز قوعامدىق ەمەس ۇيىمداردىڭ وكىلدەرىن سايلاۋ كوميسسياسىنىڭ قۇرامىنا ەنگىزۋ شارت دەگەن ويىن ءبىلدىردى. ءسوزىنىڭ سوڭىن ەرمەك ەشمۇحامەتوۆ «جاڭا قازاقستاندى قۇرعىمىز كەلسە، مەملەكەتتى ويلاۋىمىز قاجەت»،- دەپ تۇيىندەدى.
سونىمەن قاتار، وزگەدە قوعام قايرات كەرلەرى مەن كەڭەس مۇشەلەرى، اۋماقتىق سايلاۋ كوميسسياسىنىڭ قۇرىلۋىنا وزگەرىس ەنگىزىپ، ساياسي دودانىڭ دۇرىس ءوتۋى ءۇشىن ەلدىڭ بەلسەندىلىگىن ارتتىرۋ كەرەكتىگى جايلى پىكىرلەرىن ورتاعا سالدى.
اۋەلدە سايلاۋ جۇيەسىنە جاڭا فورمات ەنگىزۋگە قاتىستى كەزدەسۋگە كەلگەندەر، ەلەكتروندى جۇيەگە كوشۋ كەرەك دەستى. دەگەنمەن، اشىق ديولوگ الاڭىندا جينالعان جۇرتتىڭ ويى ەكىگە ءبولىندى. ءبىرى، ەلكتروندىق جۇيە- سايلاۋدىڭ اشىق ءارى ءادىل وتەتىنىنە ەلدىڭ سەنىمىن ۇيالاتادى دەدى. ەكىنشى توپ، شالعاي ەلدى مەكەندەردە عالامتوردىڭ جىلدامدىعىنىڭ ازدىعى مەن قاريالاردىڭ جاڭا فورماتقا ۇيرەنىسپەيتىندىگىن ايتىپ جاتتى.
ال، قر ورتالىق سايلاۋ كوميسسياسىنىڭ مۇشەلەرى بۇل فورماتقا ءالى اۋىسپايتىندىعىن، جۇيەنى جاڭاشالاۋ ءۇشىن قىرۋار قارجى قاجەتتىگىن العا تارتتى.
جيىن سوڭىندا توراعا، سايلاۋ جۇيەسىندەگى كەتەتىن ولقىلىقتاردىڭ باسىم بولىگى سايلاۋ كوميسسيالارىنىڭ مۇشەلەرى قولدانىستاعى زاڭدى بىلمەيتىندىگى دەپ قىسقا قايىردى.
قر ورتالىق سايلاۋ كوميسسياسىنىڭ توراعاسى نۇرلان ءماجيتۇلى ەلدە 70 مىڭ ۋچاسكەلىك سايلاۋ كوميسسياسىنىڭ مۇشەلەرى بار ەكەندىگىن، الايدا ولاردىڭ كوپشىلىگىنىڭ «سايلاۋ تۋرالى» زاڭدى بىلەتىندىگىنە كەپىلدىك بەرە المايتىندىعىن تىلگە تتيەك ەتتى. ءدال وسى قاتەلىك، باقىلاۋشىلار اراسىندا دا كەزدەسەتىندىگىن جەتكىزدى.
« اركىم ءوز قۇقىعىن ءبىلۋى كەرەك. وسى جاعىنان وقىپ، ۇيرەتۋىمىز قاجەت. ءبىز ءوز تاراپىمىزدان قولدان كەلگەنشە پرەزيدەنتتىڭ تاپسىرماسىن تولىق قامتۋعا تىرىسامىز. قازىر وزگەرىستىڭ زامانى. «جاڭا قازاقستان» دەگەن جالاڭ ءسوز بولىپ قالماۋى ءتيىس. ءبارىسىز دە شىنايى ءبىلىمىز بەن تاجىربيەمىزدى ەلدىڭ بولاشاعى جولىندا سارپ ەتۋىمىز قاجەت»،-دەپ قورىتىندىلادى قر ورتالىق سايلاۋ كوميسسياسىنىڭ توراعاسى نۇرلان ءماجيتۇلى.
”ادىرنا” ۇلتتىق پورتالى
