2022 جىلعى 28 ناۋرىزدا نۇر-سۇلتان قالاسىندا قر پرەمەر-ءمينيسترى ءاليحان سمايىلوۆتىڭ توراعالىعىمەن داعدارىسقا قارسى شارالار جونىندەگى جەدەل شتابتىڭ كەزەكتى وتىرىسى ءوتتى، دەپ حابارلايدى «ادىرنا» ءتىلشىسى primeminister.kz-كە سىلتەمە جاساپ.
كەڭەستە قازاقستان رەسپۋبليكاسىنىڭ قۇرىلىس جانە تۇرعىن ءۇي سالالارىن دامىتۋ پەرسپەكتيۆاسى قارالدى.
يندۋستريا جانە ينفراقۇرىلىمدىق دامۋ مينيسترلىگىنىڭ الدىن الا بولجامدارى بويىنشا 2022-2025 جىلدار ارالىعىندا قازاقستاندا 62 ملن شارشى مەتر تۇرعىن ءۇي سالىنادى دەپ كۇتىلۋدە. سونىمەن قاتار 5 201 مەملەكەتتىك نىساننىڭ قۇرىلىسى جۇرگىزىلىپ جاتىر، ونىڭ 2 137-ءسى مەملەكەت قاراجاتى ەسەبىنەن سالىنۋدا.
قازىرگى كەزدە 286 نىساننىڭ قۇرىلىسى توقتاتىلدى. 84 نىساندا جۇمىستاردىڭ توقتاۋىنا باعانىڭ قىمباتتاۋى سەبەپ بولسا، 202 قۇرىلىس باسقا دا سەبەپتەر بويىنشا (اۋا رايىنا، ماۋسىمدىق شەكتەۋلەر جانە ت.ب. بايلانىستى) توقتاتىلدى.
قر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆتىڭ ايتۋىنشا، ءاربىر نىسان بويىنشا جاعداي ساراپتالىپ، جۇمىستاردى قايتا باستاۋ مۇمكىندىگى قاراستىرىلىپ جاتىر. قر پرەمەر-ءمينيسترى نىسانداردى سالۋعا وتكىزىلەتىن مەملەكەتتىك كونكۋرستاردىڭ جوسىقسىز ۇيىمداستىرۋشىلارىن جاۋاپكەرشىلىككە تارتۋ بويىنشا شارالار قابىلداۋدى تاپسىردى.
«بيۋدجەتتىك قارجىلاندىرۋسىز قۇرىلىستارعا كونكۋرستار جاريالانادى. بۇل – زاڭ ءتارتىبىن بۇزۋ. كىنالى تۇلعالاردى ءتيىستى جاۋاپكەرشىلىككە تارتۋدى قاراستىرۋ قاجەت»، — دەدى ءاليحان سمايىلوۆ.
