جاساندى ينتەللەكت جانە NIS پەن ناۋرىز داستۇرلەرى

7501
Adyrna.kz Telegram

تۇركىستاندا ۇلىستىڭ ۇلى كۇنى قارساڭىندا ءداستۇرلى عىلىمي جوبالار بايقاۋى ءوتتى. وعان ەلىمىزدىڭ ءار وڭىرىندەگى نازارباەۆ زياتكەرلىك مەكتەبىنىڭ شاكىرتتەرى قاتىستى. بيىل سايىس جاساندى ينتەللەكت جانە مەحاترونيكا تاقىرىبىنا ارنالدى. وقۋشىلار مەديتسينا، ەكولوگيا، ماتەماتيكا، حيميا، بيولوگيا، فيزيكا باعىتىنداعى جوبالارىن ۇسىندى.

«مەن سياقتى  جاسا» سەكتسياسىندا جاس عالىمدار مەن ونەرتاپقىشتار STEAM جوبالارمەن تاڭقالدىردى، ولاردىڭ كوپشىلىگى مەديتسيناعا جاساندى ينتەللەكتتى ەنگىزۋگە ارنالعان. ماسەلەن، تاراز قالاسىنداعى NIS وقۋشىسى كاميللا ماشانلو ازىرلەگەن COVID-19 كلينيكالىق سيمپتومداردى باقىلاۋ جۇيەسى جامبىل وبلىسىنداعى ەڭ ۇزدىك ستارتاپ اتانىپ، وبلىستىق كوپسالالى اۋرۋحاناعا قولدانىسقا بەرىلدى. ورالدىق الماس ساپاروۆتىڭ اۆتورلىعىمەن دايىندالعان  ChestXRayAl قوسىمشاسى رەنتگەن ارقىلى پنەۆمونيا اۋرۋىن انىقتاۋعا مۇمكىندىك بەرەدى. شىمكەنت قالاسىنداعى حيميا-بيولوگيالىق باعىتتاعى زياتكەرلىك مەكتەپتىڭ وقۋشىسى اياۋلىم بەركىنباەۆا ناۋرىز كەزدەسۋلەرىنە جاساندى ينتەللەك نەگىزىندە جاساقتالعان FENIX بيومەتريالىق پروتەزىن الىپ كەلدى، اياۋلىمنىڭ بۇل جوباسى اۆتورلىق قۇقىق الىپ ۇلگەردى. استانالىق حالىقارالىق باكالاۆريات مەكتەپ وقۋشىسى ەكاتەرينا كيم مەن ارمان رىسماحانوۆ زاعيپ جانداردىڭ جازۋ قابىلەتىن ارتتىراتىن «JAZGYSH» يننوۆاتسيالىق قۇرىلعىسىن تانىستىردى.  قاراعاندى مەكتەبىنىڭ جاس عالىمى ۇلان ءمۇستافيننىڭ ينتەراكتيۆتى ويىندار تۇرىندەگى «STROKE REC AR» باعدارلاماسى ناۋقاستاردى ينسۋلتتەن كەيىن وڭالتۋعا كومەكتەسەدى.

ناۋرىز كەزدەسۋلەرىنىڭ باستى جوبالارىنىڭ ءبىرى تۇرمىستىق جانجالدار كەزىندە شۇعىل كومەك كورسەتۋ جانە تۇرمىستىق زورلىق-زومبىلىقتىڭ الدىن الۋ بويىنشا اقتوبەلىك جاس ونەرتاپقىش ايان قايىربەكتىڭ «UMAI ASAR» ءموبيلدى قوسىمشاسى بولدى.

ەكولوگيالىق جوبالاردىڭ ۇلكەن سەرياسى دايىندالدى، ونىڭ ىشىندە ىستەن شىققان تەحنيكالار بويىنشا «ەكىنشى ءومىر» جوباسى، سونداي-اق تۇرمىستىق قالدىقتاردى اقىلدى جيناۋعا، اتموسفەرانى جانە جالپى تابيعاتتى ساقتاۋعا، قورشاعان ورتانى قورعاۋعا، ەكولوگيالىق مادەنيەت پەن جاۋاپكەرشىلىكتى قالىپتاستىرۋعا باعىتتالعان روبوتتار مەن روبوتتىق جۇيەلەر بار.

تالدىقورعان قالاسىنداعى نازارباەۆ زياتكەرلىك مەكتەبىنىڭ 10-سىنىپ وقۋشىسى ءامينا قايراتقىزى «قالدىقتاردى سۇرىپتاۋ جۇيەسى» جوباسىن ۇسىندى. جوبا بىرنەشە روبوتتىق جۇيەلەردەن تۇرادى، ولاردىڭ ارقايسىسى قوقىس ءتۇرىن تاڭداپ، سورتتايدى.

ناۋرىز كەزدەسۋلەرىنىڭ نەگىزگى وقيعالارى رەتىندە باعدارلامانعان وقۋ-جاتتىعۋ دروندارىنىڭ ۇشۋى، «ەڭ سەيسميكالىق ءتوزىمدى قۇرىلىم» كوماندالىق ويىنى، سونداي-اق جاس ونەرتاپقىشتار قۇراستىرعان اۆتوكولىكتەر شىققان  «NIS Intell Race» اۆتوجارىستارىن اتاۋعا بولادى.

تالدىقورعان قالاسىنداعى زياتكەرلىك مەكتەبىنىڭ ينفورماتيكا ءپانىنىڭ مۇعالىمى تاسقىن بەگۋنگۋتوۆ 7-8 سىنىپ وقۋشىلارىنا «جەر سىلكىنىسىن ءتۇسىنۋ ءۇشىن ماتەماتيكالىق مودەلدەۋدى قولدانۋ» اتتى ەلەكتيۆتى كۋرس وتكىزدى.

جوبامەن جۇمىس ىستەي وتىرىپ، وقۋشىلار سەيسميكالىق مالىمەتتەردى ءتۇسىندىرۋدى، تريانگۋلياتسيانى جۇرگىزۋدى ۇيرەندى جانە سەيسميكالىق بەلسەندىلىك تەكتونيكالىق تاقتالاردىڭ قوزعالىسىنا بايلانىستى ەكەنىنە كوز جەتكىزە الدى، - دەيدى تاسقىن بەگۋنگۋتوۆ كۋرس تۋرالى.

ناۋرىز كەزدەسۋلەرى – نازارباەۆ زياتكەرلىك مەكتەپتەرى ءۇشىن ايتۋلى وقيعا، بيىل ولار ءداستۇرلى فورماتقا ورالا باستادى. جىل سايىن ناۋرىز ايىندا NIS-تە جاس عالىمدار مەن ونەرتاپقىشتار جاساندى ينتەللەكت، تسيفرلى تەحنولوگيالار جانە الەمدىك عىلىمنىڭ سوڭعى تەندەنتسيالارى حالىقتىق داستۇرلەر مەن ۇلتتىق مادەنيەتپەن قولداۋ تاباتىن بىرەگەي جوبالاردى ۇسىنادى.

 

پىكىرلەر