الماتى وبلىسىنىڭ اكىمى قانات بوزىمباەۆ جاركەنت قالاسىنداعى رەزيدەنتسياسىن بالالاردى وڭالتۋ ورتالىعى جاساۋدى ۇسىندى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.
پانفيلوۆ اۋدانىندا اۋدان تۇرعىندارىمەن كەزدەسۋ وتكىزگەن قانات بوزىمباەۆ «ءسوز رەتى كەلگەندە ايتا كەتەيىن، وسى جاركەنت قالاسىندا وبلىس اكىمىنىڭ رەزيدەنتسياسى تۇر. جەرىنىڭ كولەمى 1 گاەكتار. ماعان سول رەزيدەنتسيانىڭ قاجەتى جوق. اۋداندا قوناتىن جاپ-جاقسى قوناق ۇيلەر بار. تاماقتى ءدامدى دايىندايتىن ءدامحانالار كوپ. سوندىقتان رەزيدەنتسيانى بالالاردى وڭالتۋ ورتالىعىنا وتكىزىپ بەرەمىن. بۇل بالاسىنىڭ ءومىر ءسۇرۋى ءۇشىن ءار ءساتىن كۇرەسپەن وتكىزىپ جاتقان، ەرەكشە بالالاردى باعىپ-قاعىپ وتىرعان اتا-اناعا وتە كەرەكتى ورتالىق بولار ەدى. ورتالىق جەكە مەنشىك بولا ما، مەملەكەتتىك بولا ما، ءبارىبىر، ەڭ باستىسى ونىڭ دۇرىس جۇمىس ىستەپ كەتكەنى ماڭىزدى. سوندىقتان ءوتىنىش، ۇسىنىستار بولسا، قاراستىرۋعا دايىنمىن»، - دەدى وبلىس اكىمى قانات بوزىمباەۆ.
جالپى جاركەنتتەگى وبلىس اكىمىنىڭ رەزيدەنتسياسى 2013 جىلى سالىنعان. ءبىر قاباتتى عيماراتتىڭ كولەمى 910 شارشى مەتر. جەر اۋماعى 1 گا.
"ادىرنا" ۇلتتىق پورتالى
