تۇركيانىڭ انتاليا قالاسىنا ديپلوماتيالىق فورۋمعا نۇرسۇلتان نازارباەۆتى الىپ بارعان ۇشاق ازىرگە قازاقستانعا قايتقان جوق. ۇشاق رەيستەرىن باقىلايتىن Radarbox cايتىنىڭ مالىمەتىنە قاراعاندا، نازارباەۆقا تيەسىلى Airbus 330-243 ۇشاعى 5 كۇن بۇرىن انتاليا اۋەجايىنا قونعان سوڭ قايتىپ ۇشپاعان، دەپ جازادى "ادىرنا" ۇلتتىق پورتالى "ازاتتىق راديوسىنا" سىلتەمە جاساپ.
ديپلوماتيالىق فورۋم 11 ناۋرىزدا باستالىپ، كەشە اياقتالعان. فورۋم باعدارلاماسى بويىنشا سوڭعى كۇننىڭ جۇمىسى تۇركيا ۋاقىتىمەن تۇسكى ساعات 12-دە بىتكەن.
ءباسپاسوز حاتشىسى ايدوس ۇكىباي تۆيتتەردە ەكس-پرەزيدەنتتىڭ تۇركياعا پرەزيدەنت رەجەپ تايىپ ەردوعاننىڭ شاقىرۋىمەن بارعانىن جازعان. جيىننىڭ العاشقى كۇنى ەردوعان نازارباەۆتى جەكە قابىلداپ، كەزدەسكەنى حابارلاندى.
بىراق ەكس-پرەزيدەنتتىڭ فورۋمدا رەسمي ءسوز سويلەگەن-سويلەمەگەنى بەلگىسىز. ءارى فورۋمنىڭ رەسمي سايتىندا قاتىسۋشىلار تىزىمىندەگى 209 ادامنىڭ ىشىندە نازارباەۆتىڭ اتى-ءجونى جوق.
نازارباەۆ بيلىكتەن كەتكەنگە دەيىن دە، كەيىن دە UP-A3001 بورت نومىرىمەن تىركەلگەن ۇشاقپەن ۇشىپ ءجۇر. 2019 جىلى ازاتتىق N1 بورتتىڭ پرەزيدەنت توقاەۆقا بەرىلمەگەنىن زەرتتەگەن. زەرتتەۋ شىققان سوڭ رەيستەردى باقىلاۋ سايتتارىنداعى مەملەكەتتىك "بۇركىت" اۋە كومپانياسىنىڭ ۇشاقتارى جايلى دەرەك بۇعاتقا قويىلعان.
13 ناۋرىزدا قازاقستاننىڭ سىبايلاس جەمقورلىقپەن كۇرەس اگەنتتىگى نازارباەۆتىڭ نەمەرە ءىنىسى قايرات ساتىبالدىنىڭ قاماۋعا الىنعانىن حابارلادى. ساتىبالدى "قازاقتەلەكومنىڭ" قوماقتى قارجىسىن جىمقىردى جانە قىزمەتتىك وكىلەتىن اسىرا پايدالاندى" دەگەن كۇدىككە ىلىنگەن. قايرات ساتىبالدى – قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ نەمەرە ءىنىسى.
"ادىرنا" ۇلتتىق پورتالى
