دەپۋتات ايدوس سارىم ەكى الپاۋىت ەلدىڭ اراسىنداعى سوعىسقا قازاقستان سوڭىنا دەيىن بەيتاراپ پىكىرىن ۇستاپ تۇرۋىن جەتكىزدى. سەبەبى، بىرجاقتى پىكىر نەمەسە قولداۋ ەلىمىزگە زيان تيگىزۋى مۇمكىن، دەپ حابارلايدى “ادىرنا” ۇلتتىق پورتالى.
«قازاقستان سوڭىنا دەيىن بەيتاراپتىلىقتى ساقتاپ قالۋى كەرەك. الدە ەرىكتى بولىپ بارعىلارىڭىز كەلەدى مە؟ رەسەيدىڭ دجيھاد جاريالاعانىن قالايسىز با؟ مىنا سۇراققا جاۋاپ بەرىڭىزشى: ميلليونداعان ادامنىڭ بوسقىندار لاگەرىندە تۇرىپ، وزبەكستانعا نەمەسە قىرعىزستانعا قاشۋىن نەمەسە ءبىزدىڭ قالالاردىڭ بومبانىڭ استىندا قالعانىن قالايسىز با؟ باسقانى ايتپاي تۇرىپ، قازاقستاندىقتار ءوز شاڭىراعىنا 20 تۋىسىن كىرگىزۋگە دايىن با؟ ءبىزدىڭ اسكەرىمىز دايىن با؟ مەن ءبىزدىڭ اسكەردىڭ احۋالى قازىرگى الەمدە بولىپ جاتقان سىن-قاتەرلەرگە دايىن ەمەس دەپ ەسەپتەيمىن. قاڭتارداعى وقيعالار كوپ شىندىقتىڭ بەتىن اشىپ بەردى»، – دەدى دەپۋتات ءماجىلىس الاڭىندا سۇراق قويعان جۋرناليستەرگە.
دەپۋتات ەكى ەل اراسىنىڭ بۇزىلۋى ءھام ەكىگە ءبولىنۋى مۇمكىن ەمەستىگىن العا تارتتى.
«مەنەن ىلعي قازاقستان رەسەيدىڭ ىقپالىنان قاشان قۇتىلادى دەپ سۇرايتىن. مەنىڭ جاۋابىم ارقاشان بىرەۋ – ەشقاشان. ويتكەنى ءبىز كورشىمىز جانە ءبىزدىڭ ەكونوميكامىز ءبىر-بىرىمەن وتە تىعىز بايلانىستى. ساۋدانىڭ تورتتەن ءبىرى رەسەي ارقىلى كەلەدى. سول سەبەپتى، ءبىز ەشقاشان قۇتىلا المايمىز. ءبىز باسقا دا ارەكەتتەردى جاساي الامىز. قوسىمشا شارالار قابىلداپ، بيرجاداعى ساۋدانى شەكتەۋ ارقىلى تاۋەلدىلىكتى ءسال بولسا دا ازايتا الامىز»، – دەدى ايدوس سارىم.
“ادىرنا” ۇلتتىق پورتالى
